Te Pūtakenga Mai o Te Kete Ipurangi
Nō te marama o Oketopa i te tau 1998 ka whakarewahia e te kāwanatanga tana tuhinga e kīa nei 'Mātauranga Tauwhitiwhiti: He Rautaki Hangarau Whakawhiti Mōhio (ICT) Mō Ngā Kura'. Kua oti nei hoki ngā whāinga te tohu:
Arā, hei te tau 2002, kua:
- whakanuihia ake ngā putanga iho ako o ngā ākonga mā te whakamahi i te ICT hei tautoko i ngā uaratanga me ngā whāinga paetae o te Marautanga o Aotearoa, ka mutu ka oti hoki te whakahiki pūkenga ICT mō ngā kaiako me ngā tumuākī
- whakamahia te ICT hei whakapai ake i ngā whakahaerenga kura
- toroa haerehia ngā rohe kura hei whakahoahoa i te Hapori e nui ake ai te āhei ki te ako mā te ICT
Tahi mea nui o tēnei Rautaki Hangarau Whakawhiti Mōhio ko te whakaara Pae Tukutuku Mātauranga ki te ipurangi, kāti, ko Te Kete Ipurangi tēnā.
Te Titiro Whakamua
Te Kete Ipurangi - koia nei te Pae Tukutuku Mātauranga Reo Rua o Niu Tīreni, ka mutu he mea whakaara ia e te Tāhuhu o te Mātauranga.
E aronui ana Te kete Ipurangi kia puta ki ngā kura he papa ipurangi hei whakawhitiwhiti rauemi marautanga, rauemi whakahaere kura hoki, hei hiki ake i ngā mahi whakaako, akoako hoki, hei hāpai anō hoki i ngā paetae akonga me te whakawhanake pūkenga kaiwhakahaere, pūkenga kaiako hoki.
Ko te tikanga o Te Kete Ipurangi, hei Pae Tukutuku Reo Rua, ka:
- taea te tiki kōrero māmā, kōrero hāngai hoki i te Ipurangi mō ngā Hapori me ngā whānau kura o Aotearoa
- āwhinatia ngā kaiakoako Niu Tīreni mā te whakatika ara Ipurangi, ki te rapa kōrero hāngai, kōrero tau, rauemi hoki i te Ipurangi mō ētehi hiahia katoa o ngā kura
- purutia hei tukutuku ko ngā kōrero me ngā rauemi whai hua a te Tāhuhu o te Mātauranga
- noho hei kūwaha mō ngā kōrero whai pānga ki te mātauranga, puta noa i te Ipurangi
- whakatū Hapori akoako, hei whakawhitiwhiti kōrero hei whakairo hoki i te whanake tonutanga ake o Te Kete Ipurangi
- whakarite wāhi hokohoko mā ngā pākihi kaihokohoko hei totoro mai i te hunga aro ake ki Te Kete Ipurangi
Hapori Ipurangi o te Ao
Mā te Ipurangi ka tupu haere te Hapori Mātauranga o te Ao. Mā te āta whakatika hoki i ngā taumata me ngā momo kōrero huri noa i te Ao ka āhei anō tēnei Hapori o te Ao ki te whakwhitiwhiti rauemi, kōrero, wheako anō hoki.
E meinga ana ia he pou Te Kete Ipurangi nō tēnei Hapori Mātauranga.
Mō wai tēnei hanga Te Kete Ipurangi?
Mō ngā kura o Niu Tīreni, ngā kaiako ngātahi me ngā
akonga, ahakoa kura reo Pākehā, reo Māori rānei.
Ko te tino hunga aro ake ki Te Kete Ipurangi ko ngā:
- tumuākī
- kaiako
- mātua
- whānau
Ātaihoa ake nei ka whai wāhi atu tahi ngā akonga.
Nā te Tāhuhu o te Mātauranga te pūtea tautoko, te whaiwhai ake hoki kia eke ngā mahi o Te Kete Ipurangi.