Ko te ingoa nei: Te Kete Ipurangi
I ahu mai tēnei ingoa i ngā kupu e rua; Kete rāua ko Ipurangi.
Ki a mātou ko te Kete tonu tērā e whakaari ake ana i ētehi tino āhuatanga o tēnei paewhakaata. Arā, ōna āhua nei o te kohikohi, o te pupuru, me te tohatoha anō hoki, tae ake ki tōna tikanga mō te hari haere. Waihoki ko te tino tauira tonu o te kete ko te whiriwhiri haere i ngā muka, i ngā rau harakeke, ka tuituia ka whatua rā hei kete.
E ai ki ngā kōrero Māori nā Tāne ngā Rangi Tūhāhā i kake ake...:
"...i riro iho ai ngā kete o te wānanga
ko te kete tuauri, ko te kete tuatea, ko te kete aronui,
ka tiritiria ka poupoua ki a Papatuanuku..."
...hei whakamau iho i tēnei mea te mātauranga ki te tangata. Hei tauira anō tēnei mā tēnei mahi ā mātou, arā he huarahi anō, e tūmanakotia nei e riro mai ai anō he mātauranga ki te tangata.
Tērā anō hoki te whakataukī kōrero nei:
"nāu te rourou, nāku te rourou,
ka ora te manuwhiri"
E hāngai ana anō hoki tēnei whakataukī ki tēnei mahi inā hoki ia.
Nā ko te kupu nei Ipurangi i tikina atu i ngā kupu e rua, arā, Ipu rāua ko Rangi. Inā rā tōna tikanga he wāhi pupuru kōrero kei te rangi rorohiko nei e mau ana, ā, nō te Ao whānui anō hoki tēnei āhuatanga rorohiko ināianei, ka mutu, he kōrero heke, he kōrero hoki nō te wā.
Nā Te Taura Whiri i te Reo Māori hoki tēnei kupu Ipurangi mō tēnei mea te 'Internet'.