|
Kia maharatia ake rātou kua māwehe atu
Te hunga ko rātou ngā tohunga o ngā mahi toi
o neherā
E whakaara akengia nei e tātou i roto i te ao hurihuri.
Haere rātou. Whatungarongaro atu rātou i a rātou.
Rātou ki a rātou
Tātou ngā urupā o rātou mā
Tātou ki a tātou.
Tēnā tātou.
Nā reira, e ngā mana, e ngā reo, e ngā
rangatira
E kui mā e koro mā, huri noa i te motu
Tēnā koutou, tēnā koutou, tēnā
tātou katoa.
He mihi taurangi tēnei i a koutou e whakaako nei i ngā
marau mā te reo Māori. Ko koutou kei te mura o te
ahi e kawe ana i ngā mahi nei, ka nui tō koutou
manawanui, ka nui tō koutou kaha.
Inā rā, i te tau 1989 ka puta ko Te Tāhuhu
o te Mātauranga hei whakaruruhau mō ngā kaupapa
mātauranga. Ka mahi Te Tāhuhu o te Mātauranga
i tana mahi a puta ko Te Anga Marautanga o Aotearoa me ōna
uri: ngā tino wāhanga akoranga, nga mātāpono
me ngā kupu ārahi i ngā kura me ō rātou
poari whakahaere.
Ka haere te wā, ka puta ko ngā marautanga,arā,
ko ēnei nei, ko Te Reo Māori, ko te Pāngarau,
ko te Pūtaiao, ko te Hangarau, ko te Tikanga ā Iwi,
ko tēnei kei mua i ō koutou aroaro ko Ngā
Toi i roto i te Marautanga o Aotearoa, ka mahue mai ko
te tauāki Hauora hei whakaotinga.
Tēnā rawa atu koutou, nā koutou i para te
huarahi. Ko Ngā Toi i roto i te Marautanga o Aotearoa
tēnei, e whai atu nei i ō koutou tapuwae. Nā
koutou i tauira mai te huarahi, e kore e mutu te mihi.
E mihi ana ki a koutou katoa, i oti ai tēnei marautanga.
Otirā, ki a koutou ka whakamahi i te marautanga, kia
kaha, kia maia tonu i roto i ā koutou mahi whakamīharo
Heoi anō rā
Hon Parekura Horomia
Associate Minister of Education
|
