Te pou arataki i Ngā Toi i roto i Te Marautanga o Aotearoa

Ehara i te mea me whai rawa mai koutou i ēnei tauira kawenga. Kei a koutou te tikanga. Kāore hoki e kore ka whakahaere tahingia e te kaiako ngā mahi toi me te reo. Tērā pea ka whakamahia ko ngā tauira kawenga reo kua whakaaturia. Tērā pea, ka aro atu ki ētahi kē i runga i ngā kōwhiringa mahi. Kia mahara he tauira noa iho. He whakaaro, he āwhina hei whakapūmau, hei hiki, hei whakamahara i te wāhi o tēnei mea te reo i roto i ngā mahi ako me ngā mahi whakaako.

Ko te tūmanako, a kitea e koutou he hua i roto i ngā tauira kawenga reo nei, hei āwhina atu i tewhakatutukitanga o ngā whāinga paetae, o te mātauranga toi, mā te reo Māori.

Ko wai ka hua? Ko wai ka tohu? Tērā pea, ka ea te tangi,"Whakairohia ki te toi awe haukura."

He kōrero tātaki mō ngā toi Māori

Ko te aronga o tēnei mahi he whakapūmau, he hāpai, he tautoko i ngā mahi toi Māori mō ngā tāngata katoa o Aotearoa me te ao.

I mua i te taenga mai o te Pākehā, i a te Māori anō āna ake mahi toi hei whakamārama i ngā kitenga, i ngā rongo me ngā manako o te wairua, o te hinengaro me te tinana. I tipu ake ēnei toi i te wairua, i te hinengaro me ngā wheako o te iwi, mai i ngā wā o mua rā anō ki nāianei.

"He toi tupu, he toi ora, he toi i ahu mai i Hawaiki."

Te mātāpuna o ngā kōrero

Ko te ora ki te mātāpuna o ngā toi Māori, ko ngā whakapapa tae noa ki ngā atua, ki te taiao hoki.

Ngā whāinga

• Kia ū te ito Māori ki ngā kōrero me ngā rauemi mō ngā mahi toi Māori;
  
• Ko te hanga huarahi ia taea ai e ngā tāngata o Aotearoa te whai i ngā momo toi katoa a te Māori;
  
• Kia tipu ake, kia pakari ake ngā mahi toi Māori ki roto o Aotearoa, ā, kia tipu ake ngā tohu me ngā toi hou;
  
• Kia rongo ngā tāngata katoa i ngā huapai kei roto i ngā toi Māori;
  
• Mā ngā mahi toi e whakapakari te reo me ngā tikanga Māori;
  
• He whakapakari i ngā mahi whakahaere kia taea ai ngā manako.

"He toi whakaaro, he mana tangata."

Ngā Pou Toi Māori

• ko te Toi Puoro
  
• ko ngā Mahi a Te Rēhia
  
• ko te Toi Ataata

I whakaritea mā ngā Mahi a Te Rēhia e whakakaupapa ngā mahi toi whakaari me te kaupapa e mōhio whānuitia nei ko te kanikani. (I ētahi wā ka whakamahi tonuhia te kupu kanikani).

Mā ngā Mahi a Te Rēhia e kawe te toi whakaari, ngā mahi i heke mai i a Tānerore raūa ko Hineruhi, me ngā mahi whakatautau i whakaaria mai e ngā tīpuna i roto i ā rātou whaikōrero, ā rātou karakia, ā rātou rotarota, ā rātou kōrero pūrākau, ā rātou pakiwaitara, ā rātou kōrero paki, ā rātou mahi tinihanga, ā rātou mahi ngahau, ā rātou whakataukī me ngā whakapapa.

He tauiratanga toi

Kei roto i ngā kaupapa kua whārikihia i raro o ngā pou toi te puku o ngā mahi toi. Kāore i te noho raupapa. Mā te kaiako anō e tīpako haere kia taea ai e ia te whakarite kawenga mahi hei whakatinana i ngā whenu, hei whakawhanake hoki i ngā pūkenga o ia pou toi.

Ehara i te mea koinei noa iho ngā kaupapa, arā noa atu. Ka kitea hoki ētahi i roto i ērā atu o ngā marautanga. Ka taea hoki te whakawhitiwhiti haere, mai i tētahi pou toi ki tētahi atu.

Kei konei e whai mai ana ētahi mahi a ngā tīpuna hei tauira kaupapa toi.

Hono atu ki te tauiratanga kaupapa Toi puoro, Ngā mahi a te Rehia, me Toi ataata.