He whakataki

I tipu ake tēnei ākonga i te kōhanga reo me te kura kaupapa Māori. E kuraina ana ia i tētahi wharekura i nāianei.
He kaimahi pāmu tā tana whānau.
Ko tētahi o āna mahi i te kāinga, he tiaki i ngā kararehe a te whānau.

Te raupapa ako

Te tāutu i te hiahia

He tino whaitake te tauaromahi ki te ākonga nei, i te mea nōna tonu te hiahia e whai ana ia ki te whakaea. Nā tana mahi tiaki kararehe ka puta ēnei whakaaro, huatau hoki kia hangaia he whakaruruhau hou mō ngā heihei.

Ngā Take mō te Hanga Whare Heihei Hou – nā te tama ēnei tuhituhi:

• he paku rawa te mea tawhito
• maha haere te whānau heihei
• kia rarau te noho o ngā heihei
• mā te noho rarau ka pakari te tipu o ngā heihei, ka pai ake ngā rau o ngā heihei, a tona wa hei rau mo te korowai

Te hātepe

I whakatau iho te tama nei ki te hanga mai i tētahi whare. Ka tuhia he whakaahua o te whare hei whakaatu ki tōna matua.
E rua ngā whakaahua i tuhia e ia, ko tētahi o te whare tawhito, ko tētahi o te whare hou. Ka whakatauritea te āhua o te mea tawhito ki te whare hou.
E rua anō ngā tirohanga, mai i runga, mai i te taha hoki.

I āta whakaaro te tama me pēhea e hangaia ai e ia te whare hou, ā, i whiriwhiri anō rāua ko tōna pāpā. Kāore i nui te pūtea hei hanga i te whare hou nei, ā, oti ana te whakatau me whakamahi ko ngā rawa e wātea noa ana i tā rātou pāmu.

Ki runga

Te reo o te ākonga

He autaia tonu te whakamārama a te tama nei i te āhua o āna mahi whāiti ki te reo o ia rā.
Arā ētahi āhuatanga taha whakatakoto e tika ana kia tirohia, pērā i te kuhu i te 'e' ki ngā rerenga whakahāngū ("i tīkina (e) au", "i purua (e) au", "i purua noa iho (e) au"), ā, i tēnei taumata, me tīmata pea te kuhu i te 'ai' hei hoa mō te 'kia' ("kia kore ai e nuku ngā pou", "kia kore ai ngā heihei e puta").

He kupu taka

whakataurite	compare (and contrast)
rautaki haumaru	safety strategies
inenga aronga kē	non-standard measurements
whakatau tata	estimate

Ki runga

Ngā hononga ki te marautanga

Hangarau i roto i te Marautanga o Aotearoa

Taumata: 4

Ngā kaupeka hangarau:

Te Hangarau Matū
Te Taha Whakanao me te Taha Hātepe o te Hangarau
Ngā Hanga me ngā Pūhanga Manawa o te Hangarau

Ngā whāinga paetae

Tirohia te whārangi 32 me ngā whārangi 38–39 o Hangarau i roto i te Marautanga o Aotearoa.

Ngā tino pūkenga

• Te whakamahi tōtika i ngā taputapu, i ngā rauemi i runga i ngā tikanga e hāngai ana. (Pūkenga Tinana)
• Te aromātai i ngā hātepe me ngā otinga. (Pūkenga Hīraurau Hopanga)
• Te tā whakaahua me ētahi pitopito kōrero whakamārama. (Pūkenga Whakawhitiwhiti Whakaaro)

He huarahi anō mō te pouako

Ahakoa i mahia tēnei tauira i te kāinga, ka taea tonutia tētahi mahi pēnei i te akomanga. He tino kaupeka Ngā Hanga me ngā Pūhanga Manawa. He pūkenga motuhake anō ka mau i ngā ākonga i tēnei kaupeka. Mēnā ka tīmatahia tēnei kaupeka i te wā e nohinohi ana ngā ākonga, ka taea e ngā pakeke te hanga ētahi whare pēnei hei rūma whakatā mō te akomanga, he whakaruruhau mō te noho puni, he whare iti rānei mō te harihari mōkai. He nui ngā momo whare ka taea.

He akoranga kē atu

Anei ētahi:

• te hanga tāwhiti mō te kiore
• te hoahoa rūma moe e tika ana mō te kaihoahoa
• te hoahoa me te hanga i tētahi whakaruruhau hei ārai atu i te rā, i te hau, i te ua rānei
• te whakairo.

Ki runga

He rauemi

Te Tāhuhu o te Mātauranga. (1996). Hangarau i roto i te Marautanga o Aotearoa. Te Whanganui-a-Tara: Te Pou Taki Kōrero.

Ministry of Education. (1998). Safety and Technology Education. Wellington: Learning Media.

TKI Mātauranga Māori

Putanga tā o tēnei tauaromahi (PDF, 1.63Mb)

Ki runga