Te pūtakenga

Kua takoto mai he tauaromahi mō ngā whenu e rua o te marautanga hangarau, e hāngai ana ki ngā Taumata 1–5.

Ka noho ngātahi ngā whenu e rua i roto i ngā kaupapa whānui katoa. Koinei te āhua o te hangarau, arā, te hononga o ngā whakaaro ki te iwi, ki te taiao hoki me te pūmanawa hangarau.

Kotahi noa iho te tauaromahi ki taumata 4, ki taumata 5 hoki, nā te ruarua noa iho o ngā ākonga e mahi ana ki aua taumata. E tika ana kia hoki anō ki aua taumata ki te whakawhanake i ngā tauaromahi pēnei.

Kei roto i ētahi o ngā tauaromahi ka kitea te tūhononga me te whakawhanake haere o ngā pūkenga hangarau me ngā pūkenga ā-ringa mai i taumata 1 ki taumata 3, ā, kua pakari haere ngā ākonga me ō rātou pūmanawa.

Te tāhū hangarau
He rauemi tēnei hei āwhina i te pouako ki te whakatakoto kōwae ako me te aromatawai.

Ko te whakaharatau hangarau te tōpūtanga o te mātauranga hangarau, te whakawaiwai hangarau, ngā pūmanawa o te tangata nāna te mahi, ngā waiaro me ngā uara hoki o te kaihangarau me te hapori. Arā, ko te hononga o ngā whenu e rua.

E toru ngā ariā matua. Kei ia taumata ngā nekehanga mō ia ariā matua. Kāore ēnei ariā matua i tuhia pēneitia i roto i te marautanga, otirā, ka kitea i roto i ngā whāinga paetae.

Ki runga

He māherehere hangarau

I te Māherehere Hangarau ka whakaingoatia ia tauaromahi, ā, ka tohua anō ngā kaupeka me te taumata e hāngai ana. Ka puta anō he whakamārama poto mō ngā āhuatanga hangarau e aronuitia ana i ia tauaromahi.

Hei tauira:

Ingoa: Te Hanga Whare Heihei
Ngā Kaupeka: Ngā Hanga me ngā Pūhanga Manawa o te Hangarau; Te Hangarau Matū
Te hangahanga o tētahi whare mō ngā heihei. He nui ngā mahere me ngā hoahoa i whakamahia.

Ki runga

Ngā tauaromahi – te whakatakoto

Kei raro nei ngā whakamārama mō ngā wāhanga e kitea ana i ia tauaromahi. Kua tīkina atu ngā tauira i 'Ngā Toi Māori', he tauaromahi i te taumata 5.

Ingoa: Ngā Toi Māori
Taumata: 5

He whakataki
He kōrero poto e pā ana ki te ākonga, ki te āhua o te kura rānei.

Te raupapa ako
Ko te hātepe tēnei mai i te tīmatanga o te mahi tae atu ki te mutunga. Ka kitea ngā nekehanga mai i te kohi mōhiotanga, ki te whanaketanga o ngā pūkenga, ki te whakahoahoa, ā, ki te putanga mai o te hua, te taiao, te pūnaha rānei.

Kei ētahi o ngā tauaromahi ko te arotahitanga ki ngā tino wāhanga o te huarahi mahi. Arā, te kohi mōhiotanga, te whakaatu mōhiotanga, ngā mahere hoahoa/tohutohu, ngā pūkenga ā-ringa, te hanga tauira tuatahi, te whakamātau me te arotake, kātahi, ko te tau otinga.

Te reo o te ākonga
Ko ngā āhuatanga reo kei ngā tauaromahi ko ngā kōrero me te tuhituhi. Ka hāngai ki ētahi wāhanga o te raupapa ako me te hātepe.

Ngā hononga ki te marautanga
E whakarārangi ana ngā hononga ki te Hangarau i roto i te Marautanga o Aotearoa.

Hei tauira, ka tohua ngā kaupeka hangarau, ētahi tino pūkenga o Te Anga Marautanga o Aotearoa, me ngā horopaki hangarau e hāngai ana ki te kaupapa mahi.

He akoranga kē atu
He huarahi kē atu, he kaupapa ako kē atu ka taea tonu te whakatutuki i ngā whāinga. Heoi anō, ko te mea rerekē ko te kaupapa.

He rauemi
Ka rārangi mai ētahi rauemi hei āwhina.

Tā te ākonga mahi
Kei ngā tauaromahi mai i te taumata 1 ki te 2 e kitea ana te ārahi me te tautoko haere o te pouako. Kei ētahi he pānga whāiti, kei ētahi he pānga hōhonu. Mai i te taumata 3 kua kitea te tino takunetanga me te arotahi ki ngā hātepe tae noa ake ki te tau otinga. Ko te taumata 4 ki te 5 kua mau tūturu ki ngā tauira mai i te tīmatanga ki te mutunga.

Ki hea i nāianei
Hei āwhina tēnei i te pouako ki te whakarite akoranga: hei whakapiki ake me te whakarite mahi, kia piki, kia hōhonu ake ai ngā mōhio, me ngā pūkenga o ngā ākonga ki taumata kē.

Putanga tā o tēnei tauaromahi (PDF, 49KB)

Ki runga