He whakataki | Ngā hononga ki te marautanga | Ki hea i nāianei

Kia mataara: He hapa reo kei te haere.

He whakataki

Ko te kaupapa o tēnei tauaromahi ko te whakawhitiwhiti ētahi o ngā whakaaro whaiaro o ngā ākonga kia whakanui i a rātou i te timatatanga o te tau.

Tā tēnei mahi e whakaatu ana

E whakaatu ana i ētahi o ōna āhuatanga me ana mahi e puta ai tōna ake mauritau.

Ko te mata menemene he tamaiti harikoa.

Kua tautuhia e tōna hoa ētahi āhuatanga o te tino hoa.

Pouako:	He aha ētahi o ngā painga o Kassi Lee?
Ani:	He rawe a Kassi ki te āwhina i ētahi atu. He tino hoa ia ki ahau nō te mea, ka tākaro ia ki tōku nei taha i te wā o te kai o te rānui.

Kua tautuhia ētahi kai, ētahi mahi pārekareka ana.

Kassie Lee:	Kei te kete tuarua ngā mea pai ki ahau, ko te netipāoro. Pai hoki ki te tākaro te taura piu ki te taha o ōku hoa.
Ani:	Pai ake ki ahau ki te tākaro i runga i te rorohiko.
Kassie Lee:	Kāore tērā pai ki ahau. He pai ake ki te tākaro ki te taha o ōku hoa.
Pouako:	He aha ngā kai pai ki a koe?
Kassie Lee:	Te Meketānara, tiakareti, ngā rare me ngā hua rākau.

Ka tautuhi te ākonga i tētahi o ngā pūmanawa whaiaro. Kua whakatau tōna mauritau e pā ana ki tētahi take pōuri.

Kitea ana e te ākonga te…

Pouako:	He aha tētahi mea tata ki tō ngākau?
Kassie Lee:	Ko tōku kaihana i te mate ia, i raro ia i te papa i nāianei. I rere tōna wairua ki te taha o Ranginui. He whetū ia i ngā pō.

E āhukahuka ana te ākonga i te tautoko me te manaaki a te whānau ki a ia, ahakoa ki hea.

Kua tautuhi ia i te āhua o tana whai wāhi atu ki te whānau.

Ko tā ētahi o ngā ākonga he whakaatu i te kaha o te whānau ki te tautoko i a Kassi Lee.

Pouako:	Kōrerotia ētahi whakaaro mō tōu whānau
Kassie Lee:	I roto i te kete tuarua, ko tōku whānau. Ko Lieon, ko Colby, ko Donald, ko Māmā, ko Pāpā, ko ahau. Kei te āwhina tōku māmā i ahau, he pōtiki ahau, kei te tiaki ia i ahau. Kei te āwhina hoki tōku koro i ahau, engari, kei te noho ia ki Ahipara. Engari he whānau…

He kupu taka

ahurei	unique
āwangawanga	troubled
hihiri	brisk, energetic
mauritau	self-esteem
motuhake	unique
ngātahi	together
pōtiki	youngest child
pūmanawa	natural talents
tūhura	explore
whaiaro	personal
whakahirahira	important
whakapuaki	disclose
whakarei	enhance
whakatenatena	motivate

Ki runga

He horopaki ako

Ko tā te pouako he whakakaha i ngā ākonga ki te kōrerorero,
tautoko me te whakapiki ake i te mōhio, he kura te tangata
ahakoa ko wai, ahakoa nō hea, ahakoa te aha.

Hei ngohe tāpiritanga ka tā ngā ākonga i ō rātou ake āhua,
kātahi ka whakamārama i ētahi āhuatanga whakahirahira,
āhuatanga motuhake o ia ākonga. Ka tā pikitia anō te
ākonga i a ia me tōna whānau. I te wā matapaki
ko ētahi o ngā pātai a te pouako:

• Ki a koe, he aha ngā āhuatanga o te tino hoa?
• Ko wai ētahi kei tō whānau?
• He aha ētahi mahi pai rawa atu ki a koe?
• He aha te mea ngākaunui rawa atu ki a koe?

Ka hanga kete ngā ākonga, koia hei tohu i tētahi wāhi pupuri taonga kia haumaru. Ka matapaki te pouako me ngā ākonga i te kaupapa nui o te mauritau o te tangata me tōna mana, te manaaki anō i a ia me ngā kōrero mōna. Ko te whāinga matua i te tīmatanga o te tau ko te mahi ngātahi, ko te tautoko tahi, ko te whakawhanaungatanga.

E whā ngā kete ka hangaia e ia ākonga hei pupuri i ngā kōrero e pā ana ki ia pātai. Nā te pouako anō i whakatenatena ngā ākonga ki te whakaputa i ngā kōrero kei roto i āna kete. Kātahi ka whakaaturia ngā kete hei kai mā te karu me te hinengaro.

Ki runga

Ngā hononga ki te marautanga

Ngā aho

Anei tētahi āhuatanga wairua, hinengaro hoki e tika ana kia kōtuia atu ki ēnei whāinga paetae:

• Te whakawhiti kōrero e pā ana ki ētahi o ōna āhuatanga whaiaro.

Ngā whāinga paetae

Te waiora
Ka taea e te ākonga:

1.1 te whakaatu ngā whakaaro, ngā hiahia me ngā kare ā-roto, me te tuku pātai e pā ana ki te hauora, te tipu me te pakari haere o te tinana.

Te whānau
Ka taea e te ākonga:

1.1 te whakaahua i a ia anō i runga i te āhua o tana whai wāhi atu ki tōna whānau, ki ētahi atu horopaki.

1.2 te tūhura me te whakawhiti whakaaro e pā ana ki ngā hononga ki ētahi atu.

Ngā putanga ako

Mā te ākonga e:

• whakaahua ngā āhuatanga e ōrite ana, e rerekē ana o te tangata ka āwhina kia hanga i te tangata ahurei.
• tautuhi ngā pūmanawa whaiaro, ka whakapakari i tōna ake mauritau.
• whakaahua te āhua o tana whai wāhi atu ki tōna whānau.
• whakapuaki ōna whakaaro, ōna kare ā-roto kia piki ai tōna ake oranga.

Ngā hononga ki Te Whāriki

Mana Atua Whāinga, wh. 35.
Mana Whenua Whāinga, wh. 36-37.
Mana Tangata, wh. 35-36.

Ki runga

Ki hea i nāianei?

Ko tā ngā ākonga he:

• whakamārama ko wai ngā kaitautoko, ngā whānau ka taea e ia te kōrerorero atu mēnā e āwangawanga ana.
• tūhura i ētahi atu āhuatanga hei tautoko i tōna ake oranga.
• matapaki ā-rōpū, ā-akomanga, mō ētahi atu rōpū e whai wāhi atu ana rātou me ngā painga e pā ana ki taua rōpū, otirā he aha rātou e tau nei ki taua rōpū.
• matapaki he aha tā rātou kia tupu ai he akomanga hihiri.
• whai wāhi ki ngā tākaro ngātahi ka whakamārama i ngā painga e puta ana.

Ki runga

He rauemi

Te Tāhuhu o te Mātauranga. (2001). The Curriculum in Action. Kotahitanga. Getting on Together. Years 1-3. Te Whanganui-a-Tara: Te Pou Taki Kōrero.

TKI Mātauranga Māori

Putanga tā o tēnei tauaromahi (PDF, 1.97MB)

Ki runga