Kua takoto mai he tauaromahi mō ngā pou e toru o te marautanga Ngā toi. Kei roto i ngā pou kua whakawhanake he mahi hei whakaatu i ngā pūkenga me ngā huānga mō ngā whenu e whā, ko te tūhura, te mahi, te mōhiotanga, me te maioha. Kei roto i ngā tauaromahi ka kitea te hononga me te whakawhanake haere o ngā pou e toru me te hono ki ngā marautanga katoa.

Kāore i whakaritea he tauaromahi mō te kapa haka, i te wā o te whakawhanake tauaromahi kei te haere tonu ngā kōrero a Te Matatini hei hono i ngā taumata katoa e pā ana ki te kapa haka, mai i te kura tuatahi tae atu ki ngā pakeke.
E tika ana kia hoki anō ki tērā kaupapa ki te whakawhanake i ngā tauaromahi pēnei.

E ruarua nei te āhua o ngā toi e tae atu ki te kōeke 5 i te wā e whakawhanake ana ēnei tauaromahi. E tika ana mā te whakamahi i ngā āhuatanga toi katoa ki roto i ngā akomanga ka tere pakari, me te whai hua te kounga o ngā mahi ka eke ki te kōeke 5 neke atu.

Te tāhū Ngā Toi

He rauemi tēnei i pūtakea mai i te marautanga. Ko tāna he āwhina i te pouako ki te whakatakoto mahere me te aromatawai. E whakaatu ana te Tāhū ngā toi i ngā whāinga me ngā takahanga mātāmua o te ako i roto i ngā toi.
Koia nei ōna wāhanga.

He māherehere Ngā Toi

I te Māherehere ngā toi ka tohua anō te pou me te kōeke e hāngai ana. Ka whakaingoatia ia tauaromahi, ā, ka tohua hoki i ngā huānga ngā toi e aronuitia ana i ia tauaromahi.

Hei tauira:
Pou: Toi puoro
Kōeke: 2
Ingoa: tōku taonga whakatangitangi
Huānga: reo, oro, hā

Kua whakanōhia ngā tauaromahi ki te whenu me te kōeke i whakaarohia e tino hāngai ana. Heoi anō, tērā pea e mau mai ana ki roto he āhuatanga mai i ētahi atu whenu, i tētahi atu kōeke rānei.

Ngā tauaromahi – te whakatakoto

Kei raro nei ngā whakamārama mō ngā wāhanga e kitea ana i ia tauaromahi. He ōrite te whakatakoto mō Toi puoro me ngā mahi a te rēhia. Kua tīkina atu ngā tauira i ‘Te pānui puoro’, he tauaromahi toi puoro i te kōeke 3. He hanga rerekē te whakatakoto mō Toi ataata. Kua tīkina atu ngā tauira i te tauaromahi, ‘He putirā’, nō te tauaromahi toi ataata i te kōeke 1.

Whārangi tuatahi – Toi puoro me ngā mahi a te rēhia

E whakaatu ana tēnei wāhanga i te pou, te ingoa o te mahi, te kōeke, me ngā whenu.

Hei tauira:
Pou: Toi puoro
Ingoa: Te pānui puoro
Kōeke: 3
Whenu: Mahi, mōhiotanga

He whakataki

He kōrero hei whakamārama i te aranga ake o te kaupapa ki roto i te tauaromahi.

Ngā hononga ki te tāhū

E whakarārangi ana ngā hononga o tēnei tauaromahi ki te tāhū. He hononga ki ngā whenu huhua, ki ngā kōeke huhua rānei.

Whārangi o waenganui

Tā tēnei mahi e whakaatu ana

He kōrero e whakamārama ana i te tauaromahi tae atu ki ōna kōrero whāiti e arotahi ana ki ētahi āhuatanga o te mahi. Kua whakamahia he rārangi tuhinga hei hono i ētahi o ēnei kōrero whāiti ki te āhuatanga e hāngai ana. Ko ētahi anō kua whakanōhia ki te taha o te whakaata e hāngai ana.

Ngā tauira whakaahua

Ko te mea rerekē o ēnei tauaromahi ki ērā atu ō ngā tauaromahi ko te whakaatu i ngā mahi mā te rīpene ataata. Kāore e taea te hanga tauira ki te kore e mau ana ngā mahi pēnei. Me mahi tahi te rīpene whakaata me ēnei pepa hei whakamārama tika i ngā āhuatanga o ngā toi ki roto i ngā tauaromahi mō Toi puoro me ngā tauaromahi mō Ngā mahi a Te Rēhia.

He kupu taka

Kei konei ngā kupu ngā toi hou me ētahi atu kupu whāiti i whakamahia i roto i te tauaromahi hei āwhina noa i te pouako.

Whārangi whakamutunga

He horopaki ako

Kei tēnei wāhanga ngā putanga ako me ngā huānga kua whakamātautau ki mua i tēnei tauaromahi. Ka whakatakoto kōrero e pā ana ki ngā pūkenga toi, me ngā tikanga toi kua whakamahia e te kaiako kia tutuki pai ngā mahi ki roto i te tauaromahi.

TKI Mātauranga Māori

Putanga tā o tēnei tauaromahi (PDF, 215KB)

Ki runga