| Ngā Tauaromahi Marautanga o Aotearoa |  |
 |
 |
|
 |
Ngā Toi |
 |
|
Toi Ataata“Ngā Kete o te Wānanga” Mosaic |
Whenu: Tūhura Mahi Mōhiotanga Maioha
|
Kia mataara! He koi ngā maramara karaehe, ngā tangariki hoki. Whakamaua ētahi mōhiti hai tiaki i ō karu. Kia tika te whakamahi i te taputapu tapahi.
He whakataki
Ko “Ngā Kete o te Wānanga” tā mātou kaupapa. Ka noho ko Warren Pohatu hei tauira kaitoi. Ka whakamahia ngā whakaahua whakahoahoa toi, i hangaia rā ki runga i ngā papa ara raima, hei whakaako i ngā pūkenga e tika ana mō te hanga i tētahi whakaahua whakahoahoa toi mō waho. Otirā, e hāngai ana te mahi ki ngā tikanga hangarau. Ka mau ana ēnei pūkenga i ngā ākonga ka hangaia e rātou tētahi whakaahua whakahoahoa toi e 7m² te nui mō waho. Hei tomokanga mō te kura tēnei.
Te whakapiri taera iti.
Ngā hononga ki te tāhū
| Tūhura | Ka tūhura i te whānuitanga o te tikanga hangarau i roto i te Toi Ataata | Kōeke 4 |
|---|---|---|
| Mahi | Ka manawanui te tangata ki te whakawhanake ariā | Kōeke 4 |
| Mōhiotanga | Ka whakamārama i ngā mahi o te whiriwhiri tukanga hei whakawhanake whakaaro | Kōeke 4 |
| Maioha | Ka whai māramatanga mō te whakawhanake whakaaro o tētahi kaitoi mā te mahi | Kōeke 4 |
Tā tēnei mahi e whakaatu ana
- Te mōhio ki ēnei mea, ki te pānga rite o tētahi hanga ki tētahi atu, te mokowā, te whakataurite tae.
- He whakahāngai i ngā mahi toi ki te kaupapa.
- Te whai atu i ngā tukanga mō te whakatakoto tangariki.
He tukanga mahi
Tuhia ki runga pepa tētahi hoahoa māmā, kia oti pai ai te whakaahua whakahoahoa toi.
Tuhia te hoahoa whakamutunga ki runga i tētahi papa ara.
Whakaritea mai ngā tangariki i runga i te āhua o te whakahoahoa, arā: te wāhia, te tapahia, te kinikinihia rānei o ngā tangariki.
Whakatakotoria ngā tangariki ki runga i te papa ara. Mā tēnei e mōhiotia ai te whakatakotoranga tika. Kātahi ka whakapiri haere ai.
Kia mārō te kāpia, pania atu ko te whāpiri wai raima.
He pito hōhonu o te toi
He tika te whakamahi i te kāpia tangariki, he hāngai te pani i te whāpiri wai raima ki ngā tikanga hangarau, ā, he pai hoki te āhua.
He tōtika te whakatakoto haere i ngā tangariki.
He mārama, he tōtika nō te hoahoa e whaihua ai te hanga whakaahua whakahoahoa toi.
Ngā paetuhi pango – ka kitea ngā pānga ki ngā mahi a Warren Pohatu.
Whaihua ana te whiringa tae – ka kitea ake ngā pānga ki ngā mahi a Warren Pohatu.
He pikitia mosaic 1.
He pikitia mosaic 2.
He kupu taka
| kāpia tangariki | tile adhesive |
|---|---|
| kinikini (-hia) | nip |
| taputapu kinikini tangariki | tile nipper |
| naihi tapahi tangariki | tile cutter |
| paetuhi pango | black outlines |
| papa ara | paving slab |
| tangariki | tile |
| whāpiri wai raima | grout |
He horopaki ako
Ngā putanga ako
- Ka huri ngā whakaaro o te ākonga ki te waihanga i tētahi hoahoa hei whakaea i ētahi āhuatanga whakararu i te kaitoi arā, te hanga o te whakaahua whakahoahoa toi te kaupapa “Ngā Kete o te Wānanga”, me te tūāhua mahi a Warren Pohatu.
- Ka tūhura te ākonga i ngā taputapu hanga whakaahua whakahoahoa toi, i te naihi tapahi tangariki, te taputapu kinikini tangariki, te kāpia tangariki, te whāpiri wai raima.
- Ka mārama, ka whakaatu mai hoki te ākonga i ngā āhuatanga o te tūāhua mahi a Warren Pohatu.
Kua whakamātautau ngā ākonga i ēnei huānga ki ngā horopaki huhua, arā, te:
- tae
- mokowā.
- tohu
- āhua.
- rārangi.
E rua ngā tikanga toi o tēnei mahi
Ko te mahi tuatahi, he kimi māramatanga mō te kaupapa, Ngā Kete o Te Wānanga, me te tauira a Warren Pohatu. Ka mutu mai te pānui me te matapaki, ka whakatakotoria e ngā ākonga ō rātou whakaaro mā te tuhi pikitia. I te mutunga o tēnei kaupapa i oti mai i ngā ākonga tētahi hoahoa māmā mō tētahi tapawhā 30 x 30 cm, e pā ana ki te kaupapa me te kaitoi.
I te mahi tuarua i tūhuratia ngā tūmomo taputapu me ngā tukanga mahi e oti ai tētahi whakaahua whakahoahoa toi, ā, i hangaia hoki te whakaahua whakahoahoa toi. Ko ngā mahi, he tapahi, he wāwāhi i ngā tangariki, he whakatakoto haere kia tika te wāhi ki waenga i ngā tangariki, he ranu me te whakamahi i te kāpia tangariki, tae noa hoki ki te whakaranu i te wai raima whāpiri, otirā, ko te pani atu.
Ki hea i nāianei?
- Hangaia tētahi whakaahua whakahoahoa toi rahi ake, he whakaahua whakahoahoa toi mā te rōpū kē rānei e hanga, tētahi tēpu, he mahi toi rānei mō waho.
- Whakamātauria ētahi atu mata hei hanga whakaahua whakahoahoa toi, te rākau, te pakitara, te papa, te kōhatu, te pouaka reta, arā noa atu.
- Hangaia mai ētahi tangariki ki te uku, ā, tērā pea hei whakauru atu ki tētahi whakaahua whakahoahoa toi.
- Hangaia tētahi pou whakairo, tētahi kōwhaiwhai, tētahi tukutuku rānei mai i te whakaahua whakahoahoa toi.
He hononga ki ngā toi
Toi puoro
Whakakīkīhia he pounamu ki te maramara karaehe hai hanga manawataki, ungeri.
Ngā mahi a te rēhia
Te tito waiata mā ngā kupu o te mahi tukurua.
He akoranga kē atu
Te reo Māori
Te pānui, ngā reo toi kei Ngā Kete o Te Wānanga.
Tikanga ā-iwi
Te ako i ngā tikanga ka kitea i roto i Ngā Kete o Te Wānanga.
Pāngarau
Te Ine: Te kimi i te rohenga o ngā āhua e whakamahia ana hei whakaahua whakahoahoa toi. Te whakatau tata rānei i te rohenga. Whakaakona ngā ākonga kia kōkiri i ēnei e whai ake nei. Kia hia ngā tangariki, te nui o te whāpiri wai raima me te kāpia hei hoko.
He rauemi
Ngā Toi online: Toi Ataata. Te Kete Ipurangi. www.tki.org.nz/r/arts/ngatoi/toi_ataata/index_e.php
Kei reira te wāhanga hei tautoko, hei whakawhānui i ngā mahi Toi Ataata.
Putanga tā o tēnei tauaromahi (PDF, 1.05MB)
 |
 |