| Ngā Tauaromahi Marautanga o Aotearoa |  |
 |
 |
|
 |
Ngā Toi |
 |
|
Toi AtaataWhakapapa |
Whenu: Tūhura Mahi Mōhiotanga Maioha
|
He whakataki
I ngā toi o ēnei rā, ko ngā mahi uaua ngā mea e māmā ana te āhua. Kia waihangatia tētahi mahi toi e whakaatu ana i te whakaaro hōhonu, me iti ake ngā rawa toi ka tīkina atu e te ākonga, ā, ka mau tonu ki taua whakaaro taketake. I tēnei tauaromahi ka tirohia ēnei mea, te whakamāmātanga, te whakamahi wāhi, me ngā rawa tā maha.
Te hanga tohu whakapapa.
Ngā hononga ki te tāhū
| Tūhura | Ka tautuhi i ngā tohu ōkawa me ngā tohu ōpaki mō te Toi Ataata | Kōeke 3 |
|---|---|---|
| Mahi | Ka whakawhanake wheako whaiaro mō te Toi Ataata | Kōeke 3 |
| Maioha | Ka tautuhi i ngā toi o te ao Māori | Kōeke 2 |
Tā tēnei mahi e whakaatu ana
- Te whakaaturanga a te ākonga e pā ana ki tēnei mea, te whakapapa.
- Te waihanga mahi toi ki ētahi rawa ruarua noa iho, arā, e hāngai ana ki ngā tikanga he momo toi hua iti.
- Te ngā toi ahu-3.
- Te whakamahi māmā i te rārangi hei whakaatu i te kaupapa ako, arā, ko te whakapapa.
- Te whakamahi i te rākau hangarua kia whai kakano ai, kia whai hua ai te mahi toi.
- Te māmā me te mārama o ngā paetuhi, te whakamahi i ngā rawa ruarua noa iho.
He tukanga mahi
Ka ōhia manomano, ka rangahau, ka mahi i ētahi hoahoa.
Whakaemihia ngā rauemi kātahi ka whakatakotoria kia hāngai ki te hoahoa.
Whakaritea te tāiki o te rākau.
Peitahia te tāiki, kia rua ngā peitatanga.
Whakapirihia ngā rākau rango ki ngā wāhi tika. Whakapirihia ngā anga, kātahi ka waiho kia maroke.
He pito hōhonu o te toi
Te whakamahi māmā i te rārangi hei whakaatu i te kaupapa ako, arā, ko te whakapapa. 
Te whakamahi i te rākau hangarua kia whai kakano ai, kia whai ata ai te mahi toi. 
Te māmā me te mārama o ngā paetuhi, te whakamahi i ngā rawa ruarua noa iho.
He tohu whakapapa.
He kupu taka
| kakano | texture |
|---|---|
| paetuhi | outline |
| rākau hangarua | recycled wood |
| rākau rango | dowel |
| rawa tā maha | mixed media resources |
| ruarua | minimal |
| tāiki | surface (of wood) |
| tāpare | picture frame |
| tua | background |
| wāhi hua kore | negative space |
| wāhi hua pai | positive space |
| whakamāmātanga | simplicity |
He horopaki ako
Ngā putanga ako
- Ka rangahaua e ngā ākonga ngā kaitoi o nāianei e whai ana i te whakaaro ko te iti ake, te pai ake, arā, te momo toi hua iti.
- Ka mōhio ngā ākonga ki te whakamahi i ngā taputapu kia tika, kia haumaru hoki.
- Ka tūhono ngā ākonga i ā rātou mahi toi ki te kaupapa ako.
Kua whakamātautau ngā ākonga i ēnei huānga ki roto i ngā horopaki huhua, arā, te:
- rārangi
- tohu
- āhua
- āhuahanga.
E toru ngā tikanga toi o tēnei mahi
Ko te whakahoahoa me te whakatakoto whakaaro i mua i te hanga toi.
Ka whakawhanake mōhiotanga kia mahi tika i ngā rawa rerekē me te hangarau.
Ka whakamātautau i te wāhi hua pai me te wāhi hua kore.
Ki hea i nāianei?
- Tūhuratia te whakamahi o te kakano ki te wāhanga o tua hei whakaniko i te tohu matua.
- Rangahaua ētahi atu kaitoi e mahi ana i ngā toi rawa tā maha o nāianei.
- Whakamahia ngā rauemi hangarua hei tua, hei tāpare rānei.
He hononga ki ngā toi
Toi puoro
Ka whakamātautau i te whakaputa oro, arā ko te Tonic Sulphur.
Ngā mahi a te rēhia
Me rangahau i te takenga mai o ngā momo tū waewae a te Māori, arā, ko te ahuahungaroa, kōkirikiri hei whakaatu i te ariā toi.
He akoranga kē atu
Tikanga ā-iwi
Ka titiro ki te āhuatanga o te kura ki roto i te horopaki whānui o te hapū me te iwi.
Pāngarau
Me whakamātautau te āhuatanga o te whakapapa me tōna hono ki te Binary System.
He rauemi
Ngā Toi online: Toi Ataata. Te Kete Ipurangi. www.tki.org.nz/r/arts/ngatoi/toi_ataata/index_e.php
Kei reira te wāhanga hei tautoko, hei whakawhānui i ngā mahi Toi Ataata.
Putanga tā o tēnei tauaromahi (PDF, 1.15MB)
 |
 |