He whakataki

Ko ngā mahi e whakaaturia ana i konei, i ahu mai i tētahi akomanga tau kura 1-2. Kua mahi ngā ākonga i tētahi kōwae pāngarau e kīi ana 'Ten in the Bed' nō te pae tukutuku NZMaths. E rua wiki te roa o te kōwae, heoi, ka taea tonuhia te whakaroa atu.

Kua whakamāorihia e te pouako ngā mahi o te kōwae, ā, ka whakaritea hoki ētahi anō wāhanga mahi hei whaitanga. Koinei te wā tuatahi i tūhura ai ngā ākonga i tēnei mea te 'ture' mō tētahi raupapa tau.

Ngā ariā matua

• He momo huinga tau te raupapa tau. He tīmatanga tō te raupapa tau, ā, he ōrite te tipu o ia tau mai i te tau o mua. E taea ana te tipu o te raupapa tau te whakaahua ki tētahi ture, ā, mā te whakamahi i te ture ka whakaroatia ai te raupapa.
• Ko te pānga te āhua o te hono o ētahi taurangi e rua. E taea ana te pānga te whakaatu ki te ture, ki te tūtohi, ki te kauwhata rānei.
• He mātauranga tēnei e mārama ai te tamaiti ki ngā momo tauira me ngā momo pānga i roto i tōna ao.

Ki runga

He matapaki

Pouako:	E hia ngā waewae? (Ka tohu ki ōna ake waewae.)
Ākonga:	Rua!
Pouako:	Āe, ka pai! (Ka tohu ki a ia anō me te ākonga.) E hia ngā waewae?
Ākonga:	E whā.
Pouako:	He tika tāu. (Ka tohu ki a ia anō, te ākonga, me ngā ākonga e rua i te akomanga tonu.) E hia ngā waewae i nāianei?

He tino pai te pātai hei wero i te hinengaro o te ākonga. Nā te āhua o te pātai, i whakaaro ai te ākonga mō te pānga i roto i te tauira. Arā:

	1 tangata = 2 waewae 2 tāngata = 4 waewae 4 tāngata = ? waewae
Ākonga:	Umm (ka tātau ā-hinengaro), e waru.
Pouako:	Āe, ka pai rā! Tēnā, e hia ngā whatu? (Ko taua tokowhā tonu.)
Ākonga:	Waru! (He tere tana whakahoki mai.)
Pouako:	Nē?
Ākonga:	Āe, Whaea! Rua, rua, rua, rua, pēnei i ngā waewae. E waru!

Ki runga

Te reo o te ākonga

He tino mārama te reo o tēnei ākonga. He pai pea ki te whakatenatena i te ākonga ki te whakawhānui atu i āna whakautu kia hāngai tonu ki te āhua o te pātai.
Hei tauira: E hia ngā waewae? E whā ngā waewae.

He kupu taka

tauira raupapa	sequential pattern
tauira raupapa tau	sequential number pattern
tatau māwhitiwhiti	skip counting
pānga	relationship
tatau whakamua	count on
tatau whakamuri	count back
whakaharatau	practise

Ki runga

Ngā hononga ki te marautanga

Pāngarau i roto i te Marautanga o Aotearoa

Tāhū/Māherehere: Te Taurangi, Te Tauira, me te Pānga
Te Whāriki 'Taumata Mana Aotūroa', wh. 37 (Whāinga 3.1, wh. 88)

Ngā whāinga paetae

Te Taurangi: Taumata 1

Te torotoro tauira, pānga
I roto i ngā horopaki whai tikanga, me mōhio te ākonga:

1.1	ki te hanga, ki te whakaahua tauira tāruarua, tauira raupapa.

Pāngarau i roto i te Marautanga o Aotearoa, wh. 95

Ngā putanga ako

Kia mōhio ngā ākonga:

• he aha tēnei mea te tauira tau
• ki te kimi i te tau e whai muri ana i te tauira, ā, ki te āta tirotiro i te tika o taua tau
• ki te whakaroa i tētahi tauira raupapa
• ki te tatau māwhitiwhiti hei kimi mai i te ture mō tētahi tauira raupapa
• ki te whakamahi ture hei whakaroa i tētahi tauira raupapa.

Ngā tukanga pāngarau

Kia mōhio ngā ākonga:

• ki te whakamahi kupu, tohu rānei hei whakaahua, hei whakawhānui tauira (WA-8)
• ki te whakamārama ariā pāngarau, ki āna anō kupu, ki te reo pāngarau, ki te hoahoa pāngarau rānei (WP-1).

He kaupapa ako

He tauira

He akoranga kē atu

• Ko te tirotiro i ngā tauira tukutuku, kōwhaiwhai, tāniko.
• Ko ngā mōkai, kararehe, ngārara, e hia ngā waewae, parirau.
• Ko ngā kākahu, e hia ngā hāte, e hia ngā pātene kei ngā hāte.
• Ko te kura, ngā taputapu i te kura.
• Ko te hokohoko.

Ki runga

He rauemi

Dale, Penny (1993). Ten in the Bed. London: Walker Books

Ministry of Education (1996). Te Whāriki: He Whāriki Mātauranga mō ngā Mokopuna o Aotearoa Early Childhood Curriculum. Wellington: Learning Media.

Te Tāhuhu o te Mātauranga. (2002). He Tau Anō Te Tau! Te Taurangi, Taumata 2-3. Te Whanganui-a-Tara: Te Pou Taki Kōrero.

Te Tāhuhu o te Mātauranga (1996). Pāngarau i roto i te Marautanga o Aotearoa. Te Whanganui-a-Tara: Te Pou Taki Kōrero.

TKI Mātauranga Māori

Putanga tā o tēnei tauaromahi (PDF, 380kb)

Ki runga