He whakataki

I whakatakotoria ētahi pikitia hākinakina. I kōwhiri ngā ākonga i ngā momo hākinakina e pai ana ki tēnā, ki tēnā o rātou. Nā te pouako i whakaatu tētahi pikitia mō te poi tarawhiti (netipōro). Ka ui atu ia, "Kei a wai tētahi pikitia rite ki tāku? Kei a wai hoki tētahi pikitia rerekē?" Ka whakarōpūhia ngā pikitia i runga i ēnei āhuatanga e rua.

Ngā ariā matua

• Ko ngā raraunga he kohinga kōrero mō tētahi kaupapa. He maha ngā huarahi rerekē hei whakarōpū, hei whakaatu hoki i ngā raraunga.
• He mātauranga tēnei, he rautaki hoki hei āwhina i te tamaiti ki te whakatakoto kaupapa, ki te whakatau whakaaro, ki te tirotiro hoki i te whaitake o tētahi whakaaro.

Ki runga

He matapaki

Pouako:	He aha koe i whakatakoto ai i taua pikitia ki konei?
Ākonga:	He pōro ki taku pikitia.

E mōhio ana tēnei ākonga, he hāngai tana pikitia ki te rōpū pikitia kua whakaritea e te kaiako.

Ki runga

Te reo o te ākonga

He mārama tonu te whakautu a te ākonga, heoi, ko te whakatakotoranga tika ko tēnei, "He pōro kei taku pikitia."

He kupu taka

whakarōpū	group, classify
raraunga	data
parahau	to justify
rautaki	strategy

Ki runga

Ngā hononga ki te marautanga

Pāngarau i roto i te Marautanga o Aotearoa

Tāhū/Māherehere: Te Tauanga, Te Tūhura
Te Whāriki 'Taumata Mana Aotūroa', wh. 37 (Whāinga 3.1, wh. 88)

Te whāinga paetae

Te Tauanga: Taumata 1

Ngā hōpara tauanga
I roto i ngā horopaki whai tikanga, me mōhio te ākonga:

1.1	ki te kohikohi, ki te whakarōpū taonga o ia rangi, ki te tatau i ngā mea o roto i ia rōpū, ki te whakaari, ki te matapaki i ngā otinga.

Pāngarau i roto i te Marautanga o Aotearoa, wh. 95

Ngā putanga ako

Kia mōhio te ākonga:

• ki te whakarōpū i runga i tētahi āhuatanga rite
• ki te parahau i tāna i kōwhiri ai.

Ngā tukanga pāngarau

Kia mōhio te ākonga:

• ki te whakarōpū taonga, tau, whakaaro (WA-2).

He kaupapa ako

Hākinakina
Mahi a Te Rēhia

He akoranga kē atu

• Ko te whakarōpū āhua i runga i ngā āhuatanga ōrite.
• Ko te whakarōpū i ngā taonga o te moana i runga i ngā āhuatanga ōrite.
• Ko te whakarōpū i ngā momo hākinakina i runga i te wāhi tākaro.

Ki runga

He rauemi

He whakaahua, pikitia hākinakina
He taputapu, uta hākinakina
http://www.nzmaths.co.nz/statistics/index.aspx

Ministry of Education (1996). Te Whāriki: He Whāriki Mātauranga mō ngā Mokopuna o Aotearoa Early Childhood Curriculum. Wellington: Learning Media.

Te Tāhuhu o te Mātauranga (1996). Pāngarau i roto i te Marautanga o Aotearoa. Te Whanganui-a-Tara: Te Pou Taki Kōrero.

TKI Mātauranga Māori

Putanga tā o tēnei tauaromahi (PDF, 351kb)

Ki runga