He whakataki

Koinei te wā tuarua i tirohia ai e tēnei akomanga te whenu Tauanga. He hiahia nō te pouako ki te whakaū i ngā pūkenga kohi raraunga a ngā ākonga me tō rātou mōhio ki ngā momo kauwhata i tūhuratia i mua. Nā te pouako tonu te pātai i whiriwhiri, arā, "He aha ngā huarākau tino reka a ngā ākonga?" Ko te take, kua mauria mai e tētahi o ngā mātua o te kura he huarākau hei koha, ā, e taea ana te mau mai ētahi anō ina hiahiatia. Nā reira, he pātai tino pai tēnei hei tūhura mā ngā ākonga katoa o te kura. Tuatahi, mā te tūhura e mōhiotia ai he aha ngā momo huarākau tino reka ki a rātou. Tuarua, ko ngā hua e puta ana i te tūhura ka taea te whakamōhio atu ki te tangata nāna ngā huarākau i mau mai.

Ko tā te pouako mahi he ārahi i ngā ākonga ki ngā āhuatanga o te tūhura. I whakaritea e ia ētahi tohutohu hei whaitanga mā ngā ākonga. Ko tā ngā ākonga, he whakaaro ki ēnei tohutohu, kātahi ka whiriwhiri ai i ngā rautaki hei āwhina i a rātou ki te whakautu i te pātai. Arā, he aha ngā rautaki mō te kohikohi me te tuhituhi i ngā raraunga, me pēwhea hoki e whakaatu ai i ngā raraunga.

E rua wiki te roa o ngā mahi. Mai i te tau tuatahi ki te tau tuawhā i te kura ngā ākonga o roto i te akomanga.

Ngā ariā matua

• Ko ngā raraunga, he kohinga kōrero mō tētahi kaupapa. He maha ngā huarahi rerekē hei whakarōpū, hei whakaatu hoki i ngā raraunga.
• He mātauranga tēnei, he rautaki hoki hei āwhina i te tamaiti ki te whakatakoto kaupapa, ki te whakatau whakaaro, ki te tirotiro hoki i te whaitake o tētahi whakaaro.

Ki runga

Te reo o te ākonga

"E 7 nga tamariki ka pai i nga aporo me e 9 nga tamariki ka pai i nga ropere. E 2 nga tamariki ka pai i te arani me E 1 te tamariki ka pai i te kerepi me e 2 nga tamariki ka pai i te mereni, me E 2 nga tamariki e kore e one i ko nei? me e 7 nga tamariki ka pai i te aporo e 2 nga tamariki ka pai i te arani, e 2 ano ngā tamariki ka pai i te mereni me e 8 nga tamariki ka pai i te ropere mo tona tinana me e pai tetahi kai e 1 nga tamariki ka pai i nga kerepi me e 2 nga kerepi me e rua nga tamariki kihai i konei e nei wiki me ano. Te tahi ka pai i te arani ano me e tamariki ka pai i te ropere me ano ka pai te tahi tamariki ka pai ki te tahi aporo ano me ano me ano ia ra ia ra me mahi e nga mea katoa me e pai e 3 nga tamariki ka pai i te panana hoki me ko toku kai pai. Ko te e 1 nga mea ka pai i te aporo me 4 anake".

He tino pai ngā pūkenga tuhituhi o tēnei ākonga. He mārama, he hāngai hoki tāna i tuhi ai ki te kaupapa, ahakoa ngā paku hē. Arā, kāore he tohutō i ngā kupu e tika ana kia whai tohutō; ko te wehe i ētahi kupu pēnei i te 'Te Tahi' mō 'tētahi' ko te kaha whakamahi i te 'me' hei honohono i ngā rerenga kōrero. Me whakaako tēnei tamaiti ki ngā tikanga o te piko me te ira kati.

Tērā pea he pai ake te whakamārama ā-waha i te whakamārama ā-tuhi. Ki te whakamārama ā-tuhi, me whakarāpopoto e te ākonga ngā kōrero matua, tē tuhi noa i ngā kōrero, i ngā taipitopito katoa e kitea mai ana i te kauwhata.

Me āta tirotiro ki te kupu 'tamariki'. Kei te tika tana whakamahi i tēnei kupu i ētahi wā. Oti anō, tērā pea, kāore ia i te tino mōhio ki te rerekētanga o te 'tamariki' me te 'tamaiti'. He arotahinga tēnei mā te kaiako.

He kupu taka

whakaari raraunga	data display
taipitopito	detail
rautaki	strategy
pūnaha	system
kerepi	grape
huarahi nahanaha	systematic pathway
arotahi	focus

Ki runga

Ngā hononga ki te marautanga

Pāngarau i roto i te Marautanga o Aotearoa

Tāhū/Māherehere: Te Tauanga, me Te Tūhura

Ngā whāinga paetae

Te Tauanga: Taumata 2

Ngā hōpara tauanga
I roto i ngā horopaki whai tikanga, me mōhio te ākonga:

2.1	ki te kohi, ki te whakaatu raraunga whakarōpū, raraunga tau oti, ki te kauwhata whakaahua, ki te tūtohu tatau, ki te kauwhata pou kē rānei.

Te whakamāori pūrongo tauanga
I roto i ngā horopaki whai tikanga, me mōhio te ākonga:

2.2	ki te whakamārama i te āhua o āna anō whakaari raraunga.

Pāngarau i roto i te Marautanga o Aotearoa, wh. 129

Ngā putanga ako

Kia mōhio te ākonga:

• ki te kohi raraunga hei whakautu i tētahi pātai whai kiko
• ki te whakamahi i tētahi tūtohi tatau
• ki te whakaatu i ngā raraunga ki tētahi kauwhata whakaahua, kauwhata pou kē rānei
• ki te matapaki i ngā kōrero i whakaaturia ai ki āna anō kauwhata.

Ngā tukanga pāngarau

Kia mōhio te ākonga:

• ki te whakatakoto pātai hei torotoro ā-pāngarau (WR-1)
• ki te whakarōpū taonga, tau, whakaaro (WA-2)
• ki te tuhi, ki te whakaputa whakaaro ki ngā otinga o tētahi torotoronga pāngarau (WP-3).

He kaupapa ako

Hauora: Ngā kai a ngā ākonga

He akoranga kē atu

• Ko ngā rā o te marama i whānau mai ai ngā ākonga o te akomanga.
• Ko ngā kai reka ki ngā ākonga o te akomanga.
• Ko ngā kai i mauria mai e ia ākonga ki te kura i te rā kotahi.

Ki runga

He rauemi

Te Tāhuhu o te Mātauranga (1998). He Rauemi Pāngarau. Tauanga. Te Whanganui-a-Tara: Te Pou Taki Kōrero.

Te Tāhuhu o te Mātauranga (1996). Pāngarau i roto i te Marautanga o Aotearoa. Te Whanganui-a-Tara: Te Pou Taki Kōrero.

http://www.nzmaths.co.nz/statistics/index.aspx

TKI Mātauranga Māori

Putanga tā o tēnei tauaromahi (PDF, 377kb)

Ki runga