He whakataki

Ko ngā mahi e whakaaturia ana i konei, i ahu mai i ngā akomanga e rua, engari e whai ana i te kaupapa kotahi, arā, ko te whakaroa i tētahi tauira raupapa me te whakamahi ture. Tokorua ngā ākonga e whai wāhi ana ki te tauaromahi nei. Ko ngā mahi e whāia ana e rāua i ahu mai i ngā kōwae pāngarau o te pae tukutuku e kia ana ko te NZMaths. Ko tā ngā ākonga tokorua nei, he whakamahi ture hei hanga whare.

Ngā ariā matua

• He momo huinga tau te raupapa tau. He tīmatanga tō te raupapa tau, ā, he ōrite te tipu o ia tau, mai i te tau o mua. E taea ana te tipu o te raupapa tau te whakaahua ki tētahi ture, ā, mā te whakamahi i te ture ka whakaroatia ai te raupapa.
• Ko te pānga te āhua o te hono o ētahi taurangi e rua. E taea ana te pānga te whakaatu ki te ture, ki te tūtohi, ki te kauwhata rānei.
• He mātauranga tēnei e mārama ai te tamaiti ki ngā momo tauira me ngā momo pānga i roto i tōna ao.

Ki runga

Te reo o te ākonga

Ko te tuhinga kōrero a te ākonga tuatahi:
"I nga arai i tapiri i te 4.
I nga tieme tapiri i te 1.
I nga kuaha tapiri i te 2.
I nga matapihi tapiri 2."

Ko te tuhinga kōrero a te ākonga tuarua:
"Taperi wha mo nga pouaka whero.
Taperi tahi mo nga pouaka kahurangi."

He mārama ngā tuhituhi a ngā ākonga, engari e hapa ana te takoto o te kupu. Mō te ākonga tuatahi, he pai kē atu te whakamahi i te kupu, "Mō" hei tīmata i āna kōrero, me te whakahāngū i te tāpiri. Arā: "Mō ngā ārai, i tāpirihia te 4."

Mō te ākonga tuarua, he pai ake te whakamahi i te hāngūtanga. Arā: "Tāpirihia te whā mō ngā pouaka whero." Ki te kore e whakamahia te hāngūtanga, me pēnei kē, "Ka tāpiri i te whā mō ngā pouaka whero." Kāore hoki he tohutō i ngā tuhinga e rua.

He kupu taka

tauira raupapa	sequential pattern
tauira raupapa tau	sequential number pattern
tauira raupapa mokowā	sequential spatial pattern
tatau māwhitiwhiti	skip counting
parahau	justify

Ki runga

Ngā hononga ki te marautanga

Pāngarau i roto i te Marautanga o Aotearoa

Tāhū/Māherehere: Te Taurangi, Te Tauira, me te Pānga

Ngā whāinga paetae

Te Taurangi: Taumata 2

Te torotoro tauira, pānga
I roto i ngā horopaki whai tikanga, me mōhio te ākonga:

2.1	ki te tuhi i te roanga atu o tētahi tauira raupapa, ka whakaahua ture ai.

Pāngarau i roto i te Marautanga o Aotearoa, wh. 98

Ngā putanga ako

Kia mōhio te ākonga:

• ki te whakaroa i tētahi tauira raupapa
• ki te tatau māwhitiwhiti hei kimi mai i te ture mō tētahi tauira raupapa
• ki te whakamahi ture hei whakaroa i tētahi tauira raupapa.

Ngā tukanga pāngarau

Kia mōhio te ākonga:

• ki te kimi, ki te whakamahi tauira pāngarau hei rautaki whakaoti rapanga, ka parahau i tāna i whakamahi ai (WR-4)
• ki te whakawhānui ariā, tāpaetanga pāngarau (WA-5)
• ki te whakamārama ariā pāngarau, ki āna anō kupu, ki te reo pāngarau, ki te hoahoa pāngarau rānei (WP-1).

He kaupapa ako

Te hanga whare

He akoranga kē atu

• Ko te tirotiro i ngā tauira tukutuku, kōwhaiwhai, tāniko.
• Ko te hokohoko.

Ki runga

He rauemi

Te Tāhuhu o te Mātauranga (2002). He Tau Anō Te Tau! Te Taurangi, Taumata 2-3. Te Whanganui-a-Tara: Te Pou Taki Kōrero.

Te Tāhuhu o te Mātauranga (1996). Pāngarau i roto i te Marautanga o Aotearoa. Te Whanganui-a-Tara: Te Pou Taki Kōrero.

TKI Mātauranga Māori

Putanga tā o tēnei tauaromahi (PDF, 365kb)

Ki runga