He whakataki

I puta tēnei tauaromahi i tētahi akomanga tau whitu ki te waru. E whā wiki e whāia ana te whenu Te Āhuahanga i tēnei akomanga. I tonoa ngā ākonga kia hanga i tētahi pouaka matarau hei tākai, hei tiaki hoki i tētahi taonga. Nā te āhua o te taonga i tohua ai te rahi me te āhua o te pouaka matarau. Ko te taonga, he mea e hiahia ana ngā ākonga kia tukuna atu mā te poutāpeta ki tētahi anō tangata.

Koia nei ngā tohutohu i hoatu ki ngā ākonga:

1. Kōwhiria tētahi taonga, ka hanga ai i tētahi pouaka mōna.
2. Kōwhiria tētahi taonga, ka whakaaro ai i te āhua o tētahi pouaka mōna. Tuhia noatia ētahi pikitia.
3. Inea te taonga (tōna whānui, whāroa, hōhonu), ka tuhi ai i ngā inenga ki te pikitia o te pouaka e hiahia ana koe ki te hanga.
4. E hia ngā tapa, e hia ngā mata, e hia ngā akitu o te pouaka e whakaaro ana koe ki te hanga?
5. Hoahoatia tō pouaka ki te pepa ine-rite, ka tuhi ai i ngā inenga ki ia tapa.
6. Tāia ngā momo tirohanga nei ki tō pouaka: te tirohanga mua, te tirohanga mauī, te tirohanga matau, me te tirohanga runga.
7. Tāia te raumata o tō pouaka ki te pepa (kia tika ngā inenga).
8. Tāia te raumata ki te kāri, ka tapahi ai. Whakairohia ngā mata o tō pouaka, pōkaitia,ka hanga ai.

Ngā ariā matua

• Ka taea ngā momo āhua huhua te whakarōpū i runga anō i ō rātou āhuatanga ake.
• Ka hangaia tētahi āhua ahu-3 mai i tōna raumata. He papatahi te raumata, ko ngā mata katoa o te āhua ahu-3 e piri tahi ana. Ina pōkaitia ngā tapa, ka hua ko te āhua ahu-3.
• He mātauranga tēnei e mārama ai te tamaiti ki ngā āhua me ngā momo hanga katoa o tōna ao. He whakapakari hoki i āna rautaki whakarōpū, e nahanaha ai tana titiro ki te ao.

Ki runga

He matapaki

Ākonga:	I ine ahau i tōku taonga, kātahi, ka whakaaro ki te hanga i tētahi poro tapatoru hāngai mō te taonga. Ā, ka whakawhānui atu i ngā inenga o te taonga ki te 1.5 henemita? Um, āe.
Pouako:	He aha ai?
Ākonga:	Kia taea te whakauru i te taonga, kia piri hoki i ngā taha nei, um ... kia kati i ēnei (flaps).

Kua āta whakaaro tēnei ākonga i te āhua o tētahi pouaka hei tākai i tana taonga, me te parahau anō i ngā take me nui ake te pouaka i te taonga. He mōhio hoki ia ki te ine.

Ki runga

Te reo o te ākonga

Tā te ākonga tuhinga kōrero:

1. I te tuatahi i tīpako au i tētahi taonga hei kawe reta ki tētahi o ōku whanaunga.
2. Whai muri mai o tērā i ine au i ngā ahu e toru o tōku taonga.
3. I te tuatoru i hanga ahau i tōku raumata.
4. I te tuawhā i whakapiri au i ngā kokona, ā, i te mutunga i puru au i tōku taonga i roto i tōku tapatoru, nāianei kua mutu.

He mārama, he tika, he hāngai ngā tuhinga kōrero a tēnei ākonga. He rawe te reo raupapa o tēnei ākonga, arā, tana whakamahi i ngā rerenga pēnei i te, 'I te tuatahi' 'Whai muri mai o tērā,' 'ā'. He pai hoki mēnā ka whakamahia te reo hāngū mō tēnei momo kaupapa.
Hei tauira:
"Whai muri mai o tērā, i inea (e au) ngā tapa e toru."
"I te tuawhā, i whakapiria (e au) ngā kokonga."

E rua noa iho ngā hapa, ko te whakamahi i te kupu 'tōku' mō te taonga, te raumata me te tapatoru. Ko te 'tāku', kē te kupu e tika ana. Akene pea, he pai ake te kupu 'rau' i te 'puru'.

He kupu taka

matarau	polyhedron
raumata	net
mekameka whakaaro whaitake	chain of reasoning
nahanaha	systematic
tukutuku inerite	isometric paper
papatahi	flat
tau rahi	scale factor
tauira āwhata	scale version
akitu	vertex (vertices)

Ki runga

Ngā hononga ki te marautanga

Pāngarau i roto i te Marautanga o Aotearoa

Tāhū/Māherehere: Te Āhuahanga, Te Āhua, me te Koki

Te whāinga paetae

Te Āhuahanga: Taumata 4

Te torotoro āhua, mokowā
I roto i ngā horopaki whai tikanga, me mōhio te ākonga:

4.2	ki te hoahoa raumata hei hanga i tētahi matarau ngāwari kia eke ai te nui ki tērā kua whakaritea.

Pāngarau i roto i te Marautanga o Aotearoa, wh. 76

Ngā putanga ako

Kia mōhio te ākonga:

• ki te hoahoa pouaka matarau kia tika anō ai te āhua me te rahi
• ki te tā raumata e hāngai ana ki te pouaka matarau
• ki te hanga i te pouaka matarau i hoahoatia
• ki ngā kupu e tika ana mō te āhuahanga ahu-3.

Ngā tukanga pāngarau

Kia mōhio te ākonga:

• ki te āta whakarite torotoronga pāngarau (WR-2)
• ki te āta whai haere i tētahi mekameka whakaaro whaitake (WA-7)
• ki te whakarite, ki te whai i tētahi raupapa tohutohu hei whakatutuki mahi pāngarau (WP-2).

He kaupapa ako

Te tuku taonga ki tētahi hoa

He akoranga kē atu

• Ko te hokohoko taonga/kai hei mahi moni.
• Ko te hanga pōtae whakangahau kia rite ki tētahi tūporo te āhua.
• Ko te hanga pouaka e whai wāhi mai ana ngā rauemi e rua (pērā i te pouaka māti).
• Ko te hoahoa kōpaki.

Ki runga

He rauemi

Te Tāhuhu o te Mātauranga (2002). He Tau Anō Te Tau! Te Āhuahanga,Taumata 2-3. Te Whanganui-a-Tara: Te Pou Taki Kōrero.

Te Tāhuhu o te Mātauranga (1996). Pāngarau i roto i te Marautanga o Aotearoa. Te Whanganui-a-Tara: Te Pou Taki Kōrero.

TKI Mātauranga Māori

Putanga tā o tēnei tauaromahi (PDF, 370kb)

Ki runga