He whakataki

He wāhanga noa tēnei o tētahi kōwae ako e 30 hāora pea te roa.

Ngā whakaaro nui

Nā te ora o Papatūānuku rāua ko Ranginui ka ora ai tātou katoa, tae atu ki ngā uri katoa. Ka pā tika atu ngā mahi a te tangata ki te ora o te taiao, ki te ora o ngā mea katoa. Ahakoa ngā painga o te pūtaiao me te hangarau, ka puta hoki ētahi tūkinotanga ki a Papatūānuku.
Mā te pūtaiao me te hangarau e āhei ai te ine i te tūkinotanga, te tautohu i te takenga mai, me pēhea hoki e whakatika ai, e whakakore rānei i te tūkino tonu. Kei roto anō i ngā tikanga tiaki taiao o ō tātou tūpuna he akoranga mō tātou hei atawhai i a Papatūānuku.

Te raupapa ako

I titiro ngā ākonga i ētahi momo tūkinotanga taiao, me te titiro ki ētahi tikanga o te ao Māori e tiakina ai a Papatūānuku. Whai muri i tēnei, i whakarite ngā rōpū ākonga i tētahi tūhuratanga e hāngai ana ki te kaupapa matua, arā 'te tūkinotanga o Papatūānuku' me ngā momo mahi hei whakakore i aua tūkinotanga, pērā i te mahi hangarua/tukurua. I whakaritea kia whai wāhi atu ā rātou tūhuratanga ki tētahi whakaaturanga pūtaiao i tū ki te kura.

I tēnei tūhuratanga, i tangohia he tauira wai i te awa o Waikato, te roto o Rotoroa, te kōpapa wai o te tāone (he wai kōrere), me tētahi tātari wai.
He mea āta tātari ngā tauira wai nei. Nā tētahi tohunga pūtaiao i tuku ngā paepae pia, nāna anō i whakamārama me pēhea te whakatipu moroiti ki aua tauira, kia kitea ai mēnā he huakita kino i roto. E toru wiki (15 hāora) te roa o te tūhuratanga.

He matapaki

Pouako:	He aha ētahi atu o ngā wai kāore i whakamātautauhia e koutou?
Ākonga:	Ā muri ake, i te whakaaro mātou he pai tonu ki te whakarite mātou he tauira wai ua me tētahi puna wai hoki. Tērā pea he paru te wai i reira hoki. Ā, ā te wā ka kaukau mātou, ka māuiui mātou i te wai puna, mēnā he paru.

Te reo o te ākonga

He āhua matatau ngā ākonga nei ki te tuhi i te reo Māori. Arā ētahi whakatakoto ātaahua; hei tauira, "Ahakoa ko te tikanga he wai tino mā tēnei, kei roto kē he momo kitakita".
Kua tīmata tā rātou whakamahi i ngā kupu pūtaiao whāiti e tika ana mō tēnei tūmomo kaupapa.
Kei te hapa ētahi wāhi pērā i ngā rerenga hāngū; hei tauira, "i purua mātou i ngā kupu katoa ki roto i tētahi kapata".

He kupu taka

kitakita/huakita	bacteria
paepae pia	agar plate
tauira whakatairite	control experiment
wai kōrere	tap water
wai tātari	filtered water
whakamātautau tōtika	fair test

Ki runga

Ngā hononga ki te marautanga

Pūtaiao i roto i te Marautanga o Aotearoa

Te whenu horopaki: Ō Mataora
Taumata 3: Te Weu

Te whāinga paetae

Ka taea e te ākonga te:

6. whakarite tikanga mō tāna ake tiaki i te taiao, (pēnei i ngā whakatipu rākau i te kura; i te tukurua pepa, i te kirihou, i te rino rānei).

Pūtaiao i roto i te Marautanga o Aotearoa, wh. 22

Te whenu horopaki: Ō Kawekawe
Taumata 4: Te Aka

Te whāinga paetae

Ka taea e te ākonga te:

4. tūhura i ngā painga me ngā kino o ngā matū ki te tangata, ki te taiao (pēnei i ngā hua hinu māori, i te ua kawa, i te wairākau).

Pūtaiao i roto i te Marautanga o Aotearoa, wh. 60

Ngā whenu whakauruuru

1. Te whakawhanake i ngā uara me ngā waiaro Māori o te ākonga ki te pūtaiao kia:
   • mau ki ngā pūmanawa o ngā tīpuna
   • whai whakaaro ia ki te manaaki, ki te tiaki i te taiao.
2. Te whakawhanake i ngā pūkenga tūhura o te ākonga mā te:
   • whakawhiti whakaaro, te tuku pātai e hāngai ana, te waihanga me te whakataurite i ngā taurangi pūmau mō ngā whakamātautau tika
   • whakamahi i ngā taputapu ine, te tuhi i tāna i mātakitaki ai, i ine ai hoki, te kimi mōhio mai i te iwi kāinga, i te whare pukapuka
   • tūhono atu i ngā ia me ngā pānga ki ngā hōtuku kua āta whakaritea, te whakamahi i ngā hōtuku hei whakautu pātai, hei aro mātai rangahautanga
   • pūrongorongo i tāna i mahi ai, i kite ai i te rangahautanga, i runga anō i ngā tikanga e hāngai ana ki te hunga taipakeke.

Ngā putanga ako

Kia mārama ngā ākonga me pēhea te tūhura i te wai māori.
Kia whai ngā ākonga i ngā āhuatanga o te ako tahi.
Kia whakatakoto pūrongo ngā ākonga o tā rātou i kite ai ki tētahi Whakaaturanga Pūtaiao.
Kia whakaatu rātou i tō rātou mōhio ki tētahi momo tūkinotanga i te wai.

He akoranga kē atu

Te tūhura i ngā tūkinotanga hau, te hoihoi, me ngā tūkinotanga ka pā ki a Papatūānuku – me pēhea te ine i aua momo tūkinotanga, te pūtakenga o tēnā, o tēnā, me pēhea te ārai atu, te whakakore rānei i aua raruraru.

He rauemi

Te Tāhuhu o te Mātauranga. (1996). Pūtaiao i roto i te Marautanga o Aotearoa. Te Whanganui-a-Tara: Te Pou Taki Kōrero.

Te Tāhuhu o te Mātauranga. (1999). Tūhono Rua 1999, 'Whakamātau i te Awa Raki'. Te Whanganui-a-Tara: Te Pou Taki Kōrero.

Aperahama, Hareruia. (2001). Te Whakaaturanga Whakanui Pūtaiao. Te Whanganui-a-Tara: Huia Publishers.

TKI Mātauranga Māori

Putanga tā o tēnei tauaromahi (PDF, 499kb)

Ki runga