He whakataki

He wāhanga tēnei kōwae ako nō tētahi kaupapa i kawea e te kura whānui e pā ana ki ngā manu. Ko tōna otinga, he whakaaritanga pūrākau tūmatanui i tuituia ai ngā tini āhuatanga o ngā manu i āta tirohia e ngā tamariki.

Ngā whakaaro nui

He huinga rauropi motuhake a ngāi manu – he āhuatanga ō rātou e kore e kitea i ētahi atu huinga rauropi.
He āhuatanga urutau motuhake ō tēnā, ō tēnā momo manu, e pai ai tana noho ki tōna kāinga noho. Ko te nuinga o ngā āhuatanga nei, hei āwhina i a ia ki te kai māna. Puta noa i te ao, he nui ngā āhuatanga kino e pāpā mai ana ki ngā manu, i mōrearea ai te noho a ētahi. Mā te tātari i te pūtakenga o te noho mōrearea e kitea ai he rautaki whaitake hei tiaki i ngā manu.

Te raupapa ako

Ka rangahaua e ngā ākonga ētahi momo manu ruarua nei, tae atu ki te huia me te toroa, me te titiro whāiti ki ngā āhuatanga urutau o aua manu. I tirohia ko te āhua o te kai a ngā manu, te rere, te pīrere, me ngā urutaunga whāiti e tutuki pai ai ēnei mahi a ngā manu. I runga i ngā kitenga, ka tonoa rātou kia whakaahua i ngā āhuatanga e kīia ai te manu he manu.
Kātahi ka āta tirohia ko te itiiti haere o ngā taupori manu me te whāiti haere o ngā momo manu huri i te ao, ngā take e korehāhā ai te manu, ā, me pēhea e whakakorehia ai, e whakapōturihia ai rānei tēnei āhua. Ka rangahaua ētahi kaupapa āta whakatipu manu, kātahi ka haere ko ngā whakawhiti kōrero mō ngā āhuatanga matatika, ngā hua kino me ngā hua pai tērā ka puta ake i tēnei mea, te raweketanga ira.

He matapaki

Pouako:	He aha tāu i kite ai e pā ana ki te āhua o te kai a te huia?
Ākonga A:	Kei te tame o te huia he ngutu poto, kei te uwha te mea roa. Ka whakamahia te tame i tōna ngutu poto, ka pakaru ia i te rākau. Ka tiki te uwha ki tōna ngutu roa i ngā ngārara mā roto i te rākau. Ka mahi tahi rāua. Ka keria te uwha ki roto i te rākau pīrau, anā ka tiki te manu huia i te hūhū.
Pouako:	Mehemea rā ka taea te huia te whakaora ake anō i runga i ngā tikanga raweke ira, ka whakaae anō koe kia pērātia?
Ākonga E:	Kāo, nā te mea ka whakamate ngā tāngata anō. I ngā wā o mua, kāore ngā tāngata i whakarongo ki te kōrero kia tiaki te manu. Ka whakamate te huia hei mahi kākahu. I mōhio rātou he nui te utu. Kāore he take anō kia whakahoki mai te huia, mēnā kāore e tiaki e ngā tāngata i te wā e ora ai.

Te reo o te ākonga

He autaia tonu te hanga rerenga kōrero a te ākonga nei.
He pai tana whakaahua i ngā āhuatanga tinana o te manu.
Kua tika tana whakamahi i te kupu '(t)ōna' mō ngā wāhanga o te tinana.
Kua whakamahia he kupu kē atu mō ngā huruhuru (arā, ko te 'aweawe')
Kāore e tino tika ana te kupu 'marara' ("kei te noho marara" – Pikitia 2)
Kei te ngaro te kupu 'e' i ngā rerenga kōrero pēnei: '...kia taea (e) ia te hopu'

Kei te mōhio ngā ākonga he rerekē te hanga o ngā ngutu o te uwha i ō te tame, e pai ai tā rāua mahi tahi ki te kimi kai. Kua āta tātari anō ngā ākonga mehemea e tika ana kia whakaorangia ake anō te manu korehāhā nei.

Kei te mārama ngā whakaaro o ngā ākonga nei, ka mutu, he hōhonu tonu te whakautu ki te pātai tuarua.
Kei konā ōna anō hapa, ko tētahi ko te whakamahi tika i ngā whakahāngūtanga.
Hei tauira: Ka whakamahia te tame i tōna ngutu – Ka whakamahia e te tame tōna ngutu).

Ki runga

Ngā hononga ki te marautanga

Pūtaiao i roto i te Marautanga o Aotearoa

Te whenu horopaki: Ō Mataora
Taumata 3: Te Weu

Te whāinga paetae

Ka taea e te ākonga te:

3. rangahau me te whakamārama nā te aha i korehāhā ai ngā rauropi, kua tata rānei te korehāhā.

Pūtaiao i roto i te Marautanga o Aotearoa, wh. 22

Te whenu horopaki: Ō Mataora
Taumata 4: Te Aka

Ngā whāinga paetae

Ka taea e te ākonga te:

2. tūhura me te whakamārama ngā āhua motuhake o ngā rauropi ka whai oranga ngā whakatipuranga

4. tūhura ngā tāhuahua a ngā rauropi kia kitea ngā pānga a te tangata ki aua tāhuahua.

Pūtaiao i roto i te Marautanga o Aotearoa, wh. 24

Ngā whenu whakauruuru

1. Te whakawhanake i ngā uara me ngā waiaro Māori o te ākonga ki te pūtaiao kia:
   • whai whakaaro ki ngā tikanga me ngā taonga tuku iho a kui mā, a koro mā
   • whai whakaaro ki te manaaki, ki te tiaki i te taiao
   • rongo te whatumanawa i ngā mamae, i ngā nawe e patu nei i tōna ao, kia taea e ia te rapu, te kite ngā huarahi hei whakatikatika
   • ako i te pānga o te mātauranga pūtaiao ki ngā āhuatanga tōrangapū, āhuatanga hapori hoki
   • pūaha te hinengaro, te manawanui hoki.
2. Te whakawhanake i ngā pūkenga tūhura o te ākonga mā te:
   • whakawhiti whakaaro me te tuku pātai e hāngai ana ki te rangahau pūtaiao
   • kimi mōhio mai i te iwi kāinga, mai i te whare pukapuka
   • whakamahi i ngā hōtuku kua āta whakaritea me ngā whakaaro pūtaiao hei kī anei pea te whakautu ki ā rātou pātai.

Ngā putanga ako

Te kite i te noho taonga mai o ētahi momo manu ki tētahi hapū/iwi.
Te whakaahua i ngā āhuatanga ahurei o ētahi manu māori kua tīpakohia, me te whakamārama he aha te wāhi ki aua āhuatanga i ora ai aua manu i ō rātou kāinga noho.
Te tautuhi, he whakarāpopoto i ngā āhuatanga motuhake e kīia ai te manu he manu.
Te tautuhi i ngā āhuatanga e mōrearea ai, e mate ā-moa ai tētahi momo manu, me ngā pānga o tēnei ki ngā rauwiringa kaiao, ngā tikanga ā-iwi me ngā ritenga.
Te whakaatu i te mārama ki ngā mōreareatanga mō ngā taupori manu puta noa i te ao.
Te tātari i ngā mahi e taea ana hei here i te mate ā-moa o ngā manu, tae atu ki te whakamahi i ngā hangarau hou.

He akoranga kē atu

He whakamahi anō i tēnei raupapa ako hei titiro ki ngā ngāngara, ngā ika, me ngā rākau pēnei i te ngutu kākā.
He titiro ki ngā wāhi noho me ngā hapori o ia momo manu.

He rauemi

Te Tāhuhu o te Mātauranga. (1996). Pūtaiao i roto i te Marautanga o Aotearoa. Te Whanganui-a-Tara: Te Pou Taki Kōrero.

Te Tāhuhu o te Mātauranga. (2002). He Pākau – Ngā Manu o Aotearoa, He Aratohu Pouako, (Ngā Urutaunga, Te Ripoinga, Te Hekenga, Te Whānau Hua). Te Whanganui-a-Tara: Tōtika Publications Ltd.

Kindersley, Dorling. (1993). Picturepedia, 'Birds'. London: Dorling Kindersley Limited.

TKI Mātauranga Māori

Putanga tā o tēnei tauaromahi (PDF, 480kb)

Ki runga