He whakataki

Ko te tīmatanga tēnei o te kaituhi i te kura. Ia rā ko te mahi a ēnei tamariki he tuhituhi, ā, kitea atu ana ētahi hanga pū matua, hanga pū riki hoki. Ko te tino whāinga hoki i roto i tēnei kura kia mōhio ngā ākonga he whakamahere ngā mahi katoa. Nō reira, kei tēnei tau e mōhio ana me haere tahi te pikitia me te kōrero, otirā ko te pikitia tuatahi. Ko te kaupapa o te wā ko te "Raumati". Ko tā ngā ākonga he tuhi i tētahi wheako whaiaro e pā ana ki te raumati. Mai i te ohia manomano ka ārahi haere te pouako i ngā kōrero mō te namu. He tino tohu tēnei mō te raumati ki te tairāwhiti.

Mai i tēnei ka mahi ngā tamariki i te waiata o 'Namu' nā Hirini Melbourne hei whakawhānui atu i te kaupapa. Ko te pouako te kaitauira i te tuhituhi o tētahi pikitia nā tētahi o ngā ākonga i mahi.

Ko te tauira kia kite ngā ākonga i:

• te ture o te tuhituhi arā, mai i te mauī ki te katau
• te mana o te wāhi wātea
• te hononga o te pū me te oro
• te mana hoki o te tapanga/ingoa o te tuhituhi, arā, he ingoa o ngā mea katoa
• te mana o te pikitia hei kawe i tētahi wāhanga o te kōrero.

Hei muri ka pānui ngā ākonga i tā rātou tuhinga ki te akomanga.

Ki runga

Ngā hononga ki te marautanga

Te Reo Māori i roto i te Marautanga o Aotearoa

Te whāinga paetae

Tuhituhi: Kōeke 1i

Ka taea e te ākonga te tuhi kōrero māmā ia rā mai i tōna ao mōhio me ōna wheako whaiaro kia pupū ake te māramatanga me te hihiri ōna ki te tuhi.

Te Reo Māori i roto i te Marautanga o Aotearoa, wh. 45

Ngā pūkenga

1. Ko te whakatakoto i ōna whakaaro ki runga pepa.
2. Ko te tuhi i ngā whakapuaki māmā.
3. Ko te whakamahi i ētahi rautaki tuhituhi.

Te Reo Māori i roto i te Marautanga o Aotearoa, wh. 84

Te Whāriki

Whenu 4: Mana Reo

Te whāinga 3

Ka whai wāhi te mokopuna ki ngā kōrero me ngā tohu o tōna ake ahurea me ngā kōrero me ngā tohu o iwi kē atu.

Te Whāriki: He Whāriki Mātauranga mō ngā Mokopuna o Aotearoa
Early Childhood Curriculum, wh. 78

Ki runga

He hononga pānui me te tuhituhi

Ahakoa he aha te hōtaka pānui me whai wā te ākonga ki te tuhura i te reo. Me pānui tahi te pouako me te ākonga. Me pānui hoki i ngā pukapuka maha ki ngā ākonga. Mai i tēnei ka kite, ka tauirahia te āhua o te kupu, o te rerenga kōrero, o te ture o te tuhinga, o te kārawarawatanga. Nō reira, ko te pānui ngātahi ia rā ia rā tētahi tino huarahi hei whakaū i te hononga. Me pānui hoki ngā ākonga me te pouako i ā rātou tuhinga ia rā.

He rauemi

Te Tāhuhu o te Mātauranga (1996). Te Reo Māori i roto i te Marautanga o Aotearoa. Te Whanganui-a-Tara: Te Pou Taki Kōrero.

Te Tāhuhu o te Mātauranga (1996). Te Whāriki: He Whāriki Mātauranga mō ngā Mokopuna o Aotearoa/ Early Childhood Curriculum. Te Whanganui-a-Tara: Te Pou Taki Kōrero.

Te Tāhuhu o te Mātauranga (2001). He Rotarota. Te Whanganui-a-Tara: Te Pou Taki Kōrero.

Melbourne, H. (1995). Waiata Kōhungahunga. Wellington: Learning Media.

TKI Mātauranga Māori

Putanga tā o tēnei tauaromahi (PDF, 265kb)

Ki runga