TKI - Assessment: Exemplars: Maori: Tikanga ā Iwi

Ngā Tauaromahi Marautanga o Aotearoa

Tikanga ā-iwi

Ngā Rawa me ngā Mahinga Ohaoha

Ngā Kōhanga Pī o Waipiro

Te horopaki ako Ngā hononga ki te marautanga Ki hea i nāianei?

Tā tēnei mahi e whakaatu ana

E whakaatu ana tēnei hoahoa a Te Rangitawaea i te pakirehua. Kei te taha o ngā pikitia ngā whakamāramatanga mō ngā mahi a ngā tāngata e whai wāhi ana ki tēnei ahumahi i Waipiro, i te whare whakanao mīere.

Whāinga paetae 2

Ka taea e te ākonga te whakaatu i ngā huarahi o te whakauru a te tangata ki te tukanga o te whakanao rawa.

Ki runga

Te arotahi

Te whakawhanake pākihi ā-hapū.

Ngā mōhiotanga

Ka taea e te ākonga te:

whakamārama i ngā pānga o te ahumahi pī ki tōna hapū
whakaatu i ngā tukanga o te whakanao mīere.

Ngā māramatanga

Ko ētahi māramatanga tērā pea ka puta:

ka taea e te iwi Māori te whakawhanake me te whakahaere pākihi ki ō rātou whenua
i ētahi wā, he pai kē atu te mahi tahi ki ngā tohunga matatau ki te whakahaere pākihi.

Ki runga

Ngā hononga o ngā ariā matua ki te tāhū

2.1 Ngā ariā ā-hapū, ā-iwi, ā-rōpū rānei
- E mārama ana a Te Rangitawaea ki te tukanga o te whakanao mīere. Kua raupapatia e ia ōna pikitia me ōna tuhinga kia mārama ōna whakaaro.
2.2 Te whai wàhi atu ki te hapū, ki te iwi, ki te rōpū rānei
- E mōhio ana ia mā te tangata e tiki i te mīere i ngā kōhanga pī. E whakaatu ana ētahi o āna pikitia i ngā mahi a te tangata ki te tukanga whakanao mīere.
2.3 Ngā mea e hiranga ana
- E whakaatu ana tēnei hoahoa i ngā māramatanga a Te Rangitawaea ki ngā whakaawenga a te tangata mai i te tīmatanga ki te mutunga o te tukanga whakanao mīere. Kua whiwhi mahi ētahi o tōna hapū.

whakanao mīere.

Te pakirehua

Te kohikohi mōhiohio

I haere a Te Rangitawaea mā ki ngā kōhanga pī, ā, ko ētahi i haere ki te mātakitaki ahumahi pī. I kimihia ētahi atu kōrero i te ipurangi.

Te pātaitai

I whakawhiti kōrero, i uiui a Te Rangitawaea i ōna mātua, mō ō rāua whakaaro mō te pākihi pī ki Waipiro.

Te whakakōmaka mōhiohio

I whakaraupapa a Te Rangitawaea i ōna mōhiotanga o te tukanga whakanao mīere ki tētahi mahere nui. Nāna anō ētahi whakamārama i tuhi.

(Kua whakaatu mā te pikitia.)

Te whakatau kōrero whānui

E whakaatu ana te hoahoa a Te Rangitawaea i ētahi o ngā kaimahi o te ahumahi pī. E whakaatu atu tāna hoahoa i a Pāpā Archie, te kaitiaki o ngā kōhanga pī.

(Kua whakaatu mā te pikitia.)

He kupu taka

ahumahi pī	bee industry
ahurea	culture
hoahoa	diagram
kōhanga pī	beehive
manawapou	life-blood
pākihi	business
pakirehua	inquiry
whakaawenga	influences
whakanao mīere	honey production
whakanao rawa	resource production
whakawhanake	develop

Ki runga

Te horopaki ako

Ko tā te pouako he whakatō ki roto i ngā ākonga ngā kōrero, ngā tikanga, me te ahurea o kui mā, o koro mā, te manawapou o te Māori.

I whakawhiti kōrero te pouako rātou ko ngā ākonga, kia kimi huarahi ki te whakanao rawa. I pānui ngā ākonga i te pukapuka Te Pī Mīere, kia whai mōhiotanga rātou mō ngā āhuatanga o te pī. I hangaia he uiuinga ki ngā pakeke kia rongo ai rātou i ngā kōrero tautoko, kōrero whakahē rānei ki nga kōhanga pī. I rangahau kōrero rātou i te ipurangi. I haere rātou ki Kiekie ki te titiro ki ngā kōhanga pī, ā, ko ētahi i haere ki te kite i tētahi ahumahi pī.

Ka whakaraupapatia e Rangitawaea ōna mōhiotanga o te tukanga whakanao mīere ki runga i tētahi hoahoa.

Ki runga

He matapaki

Pouako:	Kei hea ngā kōhanga pī?
Ākonga:	Kei runga i te pātītī, kei muri i ngā rākau. Kei Tūranga, kei Whangarā ētahi. Ka haere koe ki Kiekie, ka kite koe i ngā kōhanga pī.
Pouako:	He aha rātou i hari mai ai i ngā kōhanga pī ki Waipiro?
Ākonga:	He maha ngā mānuka. He whero me te mā ngā putiputi. He kiri kei runga. He paraone te kiri.
Pouako:	He aha ngā hua ki te hapū?
Ākonga:	Kua whiwhi moni hei whakatikatika i ngā marae.
Pouako:	Ki ōu whakaaro, he aha ngā hua o tēnei mahi?
Ākonga:	Ka whiwhi mahi ngā tāngata. Ka whiwhi mīere mātou.