TKI - Assessment: Exemplars: Maori: Tikanga ā Iwi

Ngā Tauaromahi Marautanga o Aotearoa

Tikanga ā-iwi

Te Wāhi me te Taiao

Te Awahou

Te horopaki ako Ngā hononga ki te marautanga Ki hea i nāianei?

Tā tēnei mahi e whakaatu ana

E whakaatu ana tēnei mahi i ngā tukanga o te whakatau kaupapa pāpori me te tūhuratanga uara. Koinei tētahi huarahi whakatau a Rata ki te raruraru kua pā ki tōna hapū o Ngāti Rangiwewehi.

Whāinga paetae 1

Ka taea e te ākonga te whakaatu i te titiro me te whakamahi a ngā rōpū rerekē i te wāhi me te taiao.

Ki runga

Te arotahi

Te whakatau raruraru.

Ngā mōhiotanga

Ka taea e te ākonga te:

whakamārama i te take e hui ai te kaunihera ā-rohe o Rotorua ki Te Awahou
whakamārama i ngā take i whakahē ai a Ngāti Rangiwewehi i te tango wai i te awa o Te Awahou
tāutu i ngā rokohanga o te mahi tango wai a te kaunihera ā-rohe.

Ngā māramatanga

Ko ētahi māramatanga tērā pea ka puta:

“Ko tātou ngā kaitiaki o te taiao. Ko tā tātou, ko te koha atu ki ngā whakatipuranga”
he mea nui tonu kia āta whiriwhirihia te take
he rerekē ngā tirohanga ā te tangata
ka ngaro te mauri o te whenua, ka mahue mai ki a tātou te ātākura.

Ki runga

Ngā hononga o ngā ariā matua ki te tāhū

1.1 Ngā ariā ā-hapū, ā-iwi, ā-rōpū rānei
- E mārama ana a Rata he rerekē te titiro a te kaunihera ā-rohe o Rotorua ki tā Ngāti Rangiwewehi. Ki a ia tonu, ko tōna hapū te kaitiaki o Te Awahou, ehara i te kaunihera ā-rohe o Rotorua.
1.2 Te whai wāhi atu ki te hapū, ki te iwi, ki te rōpū rānei
- E mōhio ana ia, ko te tirohanga a te Kaunihera ā-Rohe o Rotorua, ko te tango wai hei whāngai atu ki Rotorua whānui. Ko te tirohanga a te hapū, he hononga tō rātou ki te awa, he oranga kei roto i taua awa mō te ao Māori, ehara i te mea mō te tinana anake. Ko tāna, me mutu te tango wai.
1.3 Ngā mea e hiranga ana
- E whakaatu ana ngā tuhinga a Rata i te oranga tinana, i te oranga wairua kei roto i te awa. Ka ngaro te wai, ka ngaro te whakapapa, ka ngaro te tangata.

Me mutu te tango wai.

Te whakatau kaupapa pāpori

Te tāutu take me ētahi raru o te pāpori

Kei te mōhio a Rata kāore a Ngāti Rangiwewehi e rata ki te whakataunga a te kaunihera ā-rohe o Rotorua ki te tango wai i Te Awahou. Kāore rātou i whitiwhiti kōrero ki te hapū.

Te whakawhanake hiraunga

Kei te mōhio ia he maha ngā kōrero tuku iho a te hapū mō Te Awahou. Ka raru te awa, ka raru te oranga tinana me te oranga wairua o te tangata.

Te kōwhiri i tētahi whakahau me te whakamana i taua kōwhiringa

I tuhi reta a Rata ki te komiti whakahaere o te kaunihera ā-rohe o Rotorua. Ko ana whakahau, me whakamutu te mahi tango wai a te Kaunihera. Mēnā kāore rātou e rata ki tēnei kōrero me haere atu rātou, kia kaua rātou e hoki mai.

(Kua whakaatu mā te pikitia.)

Te whakamārama i ō rātou ake uara

Ko Pekehaua te tipua o Ngāti Rangiwewehi. Ko Te Awahou te mimi o Pekehaua. Koinei te hononga ki te whakapapa o Rata. Koinei ngā kōrero tawhito. Kaua e tangohia te wai, kei ngaro te whakapapa. Ka whakairo kore.

Te tūhurutanga uara

Te homai take e whai ai te tangata i tētahi uara

Kei te mōhio a Rata ka kore he wai, ka kore he kāinga mō Pekehaua, ka kore he kai mā te iwi, ka mate hoki ko te hinengaro. Kua ngaro te mauri o te whenua, ka mahue mai ki a tātou te ātākura.

He kupu taka

ahurea	culture
arotahi	focus
ātākura	shadow
manawapou	life-blood
papa kōhatu	stonefields
pāpuni	dam
rokohanga	consequences
tūhuratanga uara	values exploration
whakaara ake	raise up
whakaawenga	infl uences
whakairo kore = whakatau kaupapa	unknown geneology
pāpori	social action

Ki runga

Te horopaki ako

Ko tā te pouako, he whakatō ki roto i ngā ākonga ngā kōrero, ngā tikanga, me te ahurea o kui mā, o koro mā, te manawapou o te Māori.

I whakawhiti kōrero te pouako rātou ko ngā ākonga mō ngā tautohenga i waenganui o te hapū o Ngāti Rangiwewehi me te Kaunihera o Rotorua. E hiahia ana rātou ki te tango wai mai i te awa o Te Awahou hei whāngai atu ki te rohe whānui o Rotorua. I haere ngā ākonga ki Te Awahou ki te whakarongo ki ngā kōrero tuku iho mō Pekehaua rāua ko Hinerua. Ka mārama ngā ākonga ki ngā whakaawenga o ngā mahi a te Kaunihera i te wāhi me te taiao, me te whakaawenga o ēnei āhuatanga ki a rātou o Te Awahou.

Ka tuhia e Rata he reta hei whakaara ake i te kaunihera ā-rohe o Rotorua.

Ki runga

He matapaki

Pouako:	Nō hea ō mōhiotanga mō Pekehaua?
Ākonga:	Nō tōku kuia. Nā tōku kuia i kōrero mai ki ahau. Kei te kōhanga ia e mahi ana. Ka waiata ia mō Pekehaua rāua ko Ngāti Rangiwewehi. He rite tana waiata ki te whakapapa, “Ko ngā mimi o Pekehaua.”
Pouako:	Ko wai mā i āwhina i a koe?
Ākonga:	Ko Whaea Tamara. I haere mai a Koro Toro ki te marae ki te kōrero ki a mātou i ngā kōrero e pā ana ki te awa. I kōrero anō ia mō ā rātou haerenga ki te awa ki te kaukau.
Pouako:	He aha ētahi atu kōrero mō Pekehaua?
Ākonga:	Ko Pekehaua te taniwha o te awa o Awahou. Ko ia te kaitiaki o te awa me te iwi. Mēnā ka pīrangi tētahi atu ki te whānako i tētahi rawa a te iwi, ka pūkana ōna karu, ka mataku tērā tangata.

Ki runga

Ki hea i nāianei?

Kia tipu tonu tēnei ākonga, me arotahi ki:

te taurite i ngā mahi a te kaunihera ā-rohe o Rotorua ki ngā mahi a ētahi atu kaunihera ā-rohe, pērā i ngā whakahaerenga o:
- te kaunihera ā-rohe o Whakatane ki te pāpuni i Matahina
- te kaunihera ā-rohe o Tāmaki ki ngā papa kōhatu o Otuataua
te rangahau he aha pea ētahi o ngā whakaawenga o ēnei mahi ki ngā tāngata whenua, arā:
- te kawe atu i te wai ki ngā tāone nui
- ngā whakapikinga o ngā tāke whenua
- te hekenga o te wai
- te kore kai i ngā awa.

Ki runga