|
Ko tēia tē ka rave'ia ...
|
'Ea'a te tumu?
|
E tuatua i te au kupu tūkētūkē:
- i te au kupu 'akako'uko'u 'āite'anga
- i te au kupu nō te au 'apinga tātakita'i
- i te au kupu nō runga i tēta'i tumu manako.
|
Ko te ma'ata atu o te kupu tā tēta'i tamaiti kā kite, ko te ma'ata atu ia o te reo tē ka rauka iāia i te tā'anga'anga nō te tuatua, pērā katoa te tatau, te tātā, 'ē te 'anga manako.
|
|
E tuatua i tō'ou manako kia pou ki va'o – e 'akapou tikāi i te au taime kātoatoa i tā'au tākiato-kōrero.
|
Ka 'inangaro'ia kia mārama te tamariki ē, ka 'akapē'ea te kāpitipiti'anga i te kupu, nō te 'anga i tēta'i manako katoa.
|
|
Ka tuatua koe 'ē ka tuatua tā'au tamaiti.
Ka uiui koe kiāia 'ē ka uiui atu 'aia kiā koe.
Ka kimi manako koe, kā 'anga manako koe; ka kimi manako katoa tā'au tamaiti, 'ē kā 'anga manako.
|
Ka 'inangaro'ia kia rauka tō tā'au tamaiti kite 'ōu mei kona mai iā koe, 'ē ka 'inangaro katoa'ia kia tāmatamata tā'au tamaiti i tāna au tuatua 'ōu 'ē tōna au manako 'ōu.
|
|
Mē tuatua kōrua, 'ē mē kimi kite 'ōu kōrua ko tā'au tamaiti, e ma'ani koe kia mataora, kia rauka tēta'i pu'apinga nō kōrua, 'ē kia 'akaperepere katoa kōrua tēta'i ki tēta'i.
|
Ka 'inangaro'ia kia mataora 'ua tā'au tamaiti i roto i tōna ngākau, 'ē kia mārama tikāi 'aia i te 'āite'anga o tā te tangata tuatua.
|
E tuatua nō runga i tēta'i 'ua atu tumu manako, i tēta'i 'ua atu taime, i tēta'i ngā'i 'ua atu rāi.
E tuatua ki tā'au tamaiti i te au taime kātoatoa.
|
Ko te tamaiti tei rauka iāia tēta'i tūranga mātūtū i te reo, ka tāmatamata, ka tāmou ngākau, 'ē ka tā'anga'anga 'aia i taua tūranga reo mātūtū ra.
Mē tā'anga'anga i reira 'aia i taua tūranga reo mātūtū ra, ka ngō'ie ake 'aia i te rave mai i te au kite 'ōu i tēta'i 'ua atu taime.
|
Ka meitaki tēta'i 'ua atu rāi i te tuatua ki te tamariki:
- te pāpā rū'au 'ē te māmā rū'au
- te au 'angakara 'ē te au 'ānit`i
- te teina, te tuakana, te tungāne, te tua'ine
- te au tangata i tō'ou tapere, 'ē te au taeake 'ātoro mai
- tā'au tangata ka 'ārāvei i tēta'i 'ua atu ngā'i.
|
'E mea tau 'ē te rauka-ngō'ie 'ua i te tangata i te tauturu i te tamariki i te 'akameitaki atu 'ē te 'akarava atu i tō rātou reo.
|
