|
Nā te tatau e rauka ai te kite! 'E mea ririnui te tatau!
Kia tatau kāpiti kōrua.
Kia tatau kāpiti kōrua ko tā'au tamaiti, 'ē kia tatau koe kiāia
i roto i te ngutu'are 'ē i te au ngā'i kātoatoa.
- Tei te au ngā'i kātoatoa te au kupu tei nene'i'ia, 'ē te au kupu tei tātā'ia. Kia kimi kōrua i tē reira, kia tatau kōrua i tē reira, 'ē kia tuatua katoa kōrua nō runga i tē reira.
- Mē tatau 'ua rāi koe ki tā'au tamaiti, 'ē mē tatau kāpiti 'ua rāi kōrua i te au rā kātoatoa, kā riro tā'au tamaiti 'ei tamaiti māro'iro'i tikāi i te tatau!
- I tēta'i taime, ka 'inangaro te tamariki i te tā'oki 'ua rāi i te tatau i taua puka rāi, nō reira, kia 'akatika koe i tōna anoano – 'e mea meitaki 'oki te tā'oki 'aka'ou, e tae 'ua atu ki te 'ati'anga e 'inangaro ei kōrua i te 'akamutu.
- E ma'ani koe kia mataora te tuātau tatau! Mē mataora 'oki kōrua i te tatau i te puka, ka mataora katoa kōrua i te tuatua nō runga i tē reira.
- E tatau nā roto i tō'ou 'ua'orāi reo. Mē kite tikāi 'oki te tamariki i te tū o te puka 'ē te au kupu tei tātā'ia 'ē tei nene'i'ia i roto i tēta'i 'ua atu reo (i roto tikāi i te reo mātūtū e tuatua 'ua'ia ana i roto i te ngutu'are), ka rauka-ngō'ie iāia i te kite i te tatau meitaki nā roto i tēta'i reo kē, mei te reo Papa'ā 'ē tēta'i 'ua atu reo.
- Nā'au rāi e tātā i tēta'i au kupu 'ē tēta'i au tua nā'au. Kā reka tikāi i te tatau i te au mea ē, nā'au tikāi, mē kāre, nā tā'au tamaiti tikāi i tātā.
- E tuatua atu ki te pū'āpi'i o tā'au tamaiti, nō runga i te tatau a tā'au tamaiti.
- Kia tiki puka koe ki kō i te 'are puka o tō'ou tapere, mē kāre, ki kō i te 'are puka o te 'āpi'i; 'e mea tūtaki-kore 'oki tē reira.
Kia 'akamātau koe iā koe i te tatau, ma tō'ou kōpū-tangata kātoatoa.
|
