Te Reo Māori
Ko wai mā ngā kaituhi?
Peti Nohotima, Awhina Gray, Cath Rau, Joan (Pepi) Walker, Sophie Tukukino, Hineihaea Murphy
He aha ngā rerekētanga?
- E toru anake ngā whenu, ko: ā-waha, ā-tā, ā-tinana
- E toru ngā whāinga paetae matua - ahakoa te taumata, ahakoa anō te whenu, e hāngai tonu ana ēnei whāinga matua.
- E whā ngā papa i te taumata tuatahi
He aha i rerekē ai?
Ngā whenu e toru:
Kua āta whakaritea ngā whenu e toru e kitea ai ngā huarahi matua mō te whakawhitiwhiti whakaaro, whakawhitiwhiti kōrero, arā, mā te waha, mā te tā, mā te tinana. Ko tā ngā whenu e toru nei, he whakatenatena i te kaiako kia whānui, kia hōhonu tana titiro ki te reo, kia whakaako tahi, kia tuitui anō i ngā wāhanga katoa o te reo, arā, te whakarongo, te kōrero, te pānui, te tuhituhi, te whakaatu, te mātakitaki.
Ngā whāinga paetae matua e toru
Hei raranga i ngā whenu e toru, arā ngā whāinga paetae matua e toru. Ko tā ēnei whāinga paetae matua he whakawhānui, he kōtuitui i te ako o te reo, ā, he whakaatu atu anō hoki i ngā wāhanga matua o te ako reo arā, ngā āheinga reo, te puna kupu, ngā rautaki reo. Mā ēnei whenu paetae matua e māmā ake ai te kite atu i te hononga i waenganui i ngā taumata.
Ngā papa e whā i te taumata tuatahi
Ka kitea te tino rerekētanga o ngā reo i ngā tamariki nonohi kātahi anō ka tīmata i te kura. Ko ētahi he pīpī i roto i te reo, ko ētahi kua pakari. Kia taea ai ngā papa reo maha e te kaiako te whakahaere i te urunga tuatahi o te tamaiti ki te kura me te honohono tonu i te marautanga reo Māori ki Te Whāriki, kua āta whakarārangihia kia whā ngā papa o te taumata tuatahi. Ehara i te mea, ka rite te roa o te noho atu a te ākonga ki tēnā, ki tēnā o ngā papa nei. Ka poto noa iho pea te wā ki tētahi papa, ka āhua roa ake pea ki tētahi atu papa kātahi ka neke whakamua anō.