Te wāhanga ki ngā ākonga, ngā mātua, ngā kaitiaki rātou ko te hapori whānui
Ākonga mā
E tika ana me whai wāhi ā tātou tamariki ki te whakaputa i ō rātou whakaaro mō te ako i te kura. Ka pēhea ō rātou whakaaro mō tēnei mea te ako? He aha ō rātou ake whāinga mō te wā e heke mai? He aha hoki ō rātou ake mōhio mō ngā wāhanga ako kei te whakaakohia i roto i ngā kura?
Ko ngā pātai hei whakahoki mā ngā ākonga i roto i te puka Kōrerohia. Pānuihia he tauira noa iho. Ko ngā ākonga e āhei ana, waiho pea mā rātou ētahi pātai hei hanga. Ko tā te kura he kohikohi i ngā whakaaro, ngā kōrero whakahoki a ngā ākonga hei āwhina, hei ārahi hoki i ngā mahi whakarite mahere ako.
Mātua mā
E tika anō hoki me whai wāhi ngā mātua ki te whakaputa i ō rātou whakaaro mō te ako i te kura. Ka pēhea ō rātou whakaaro mō tēnei mea te ako? He aha ō rātou ake whāinga mō te wā e heke mai? He aha hoki ō rātou ake mōhio mō ngā wāhanga ako kei te whakaakohia i roto i ngā kura?
Mā te kura ētahi pātai e whakarite hei kōrerorero mā ngā mātua. Ko ngā mātua e āhei ana, waiho pea mā rātou ētahi pātai hei hanga, hei whakahoki. Ko tā te kura he tuku wā mā ngā mātua ki te tiro i Te Marautanga o Aotearoa kia mārama rātou ki ngā wāhanga o te pukapuka, kia mārama hoki rātou ki ngā wawata o te pukapuka mō ā tātou tamariki, mokopuna. Mā te kōrero ka mārama. Mā te mārama ka mōhio.
Hapori whānui
"Ko te manu e kai ana i te miro nōna te ngahere. Ko te manu e kai ana i te mātauranga nōna te ao." E tika hoki me whai wāhi te hapori whānui ki te whakaputa i ō rātou whakaaro mō ngā hua o Te Marautanga o Aotearoa: He tauira hei kōrerorero. Ka pēhea ō rātou whakaaro mō tēnei mea te ako? He aha ō rātou ake whāinga mō te wā e heke mai me ngā kaimahi kei te pīrangitia? He aha hoki ō rātou ake mōhio mō ngā wāhanga ako kei te whakaakohia i roto i ngā kura?
He pātai noa iho. He tauira noa iho ēnei hei whakaaro ake mā koutou. Mā te kura ētahi pātai e whakarite hei kōrerorero mā te hapori whānui. Ko ngā tāngata e āhei ana, waiho pea mā rātou ētahi pātai hei hanga, hei whakahoki. Ko tā te kura he tuku wā kia mārama rātou ki ngā wāhanga o te pukapuka, kia mārama hoki rātou ki ngā wawata o te pukapuka mō ngā kaimahi o te wā kei te heke mai.