Kei hopu tōu ringa
ki te aka tāepa,
engari kia mau
ki te aka matua.
Ko te roanga atu o ngā kōrero ka kitea i roto i te pakiwaitara mo
Tāwhaki rāua ko Tangotango. I tīkina atu te whakatauākī nei hei tāhū mo
tēnei marautanga, hei poutāwhā mō ngā āhuatanga
katoa e pā ana ki te mahi pāngarau, otirā, ki te noho-ā-tinana
i runga i te mata o te whenua.
He kōrero rāngatira tēnei, he kōrero wairua, i whakamātauhia
ai a Tāwhaki i tōna wa, ki te whakarongo, ki te whiriwhiri,
ki te wānanga, ki te tātai ā-hinengaro, ā-wairua,
ki te whakaoti rāpanga, ae rānei, kāore rānei, me whai
ia i te aka matua, i te aka tāepa rānei. I hoatu mana anō
hei whakatau, ko tēhea te arā tika, e taea ai te whakatutuki tāna
i ngākaunui ai.
Ko te aka matua, he tikanga e mau pai ai, e pūmau ai te mahi pāngarau
i ā tātou tamariki. Ki te whakaaro me mārama a tātou
tamariki ki ngā tikanga, ki ngā āhuatanga, ki ngā
wānanga o tēnei mea o te mahi pāngarau. Nā, ko taua
māramatanga nei te aka matua.
Engari rā te aka tāepa. Ko tērā te aka mōwhakiwhaki.
Mehemea ka ako noa iho ā tātou tamariki i ngā tini 'ture',
kāore e roa kua rāruraru te nuinga o ngā tamariki. Kua
nui ake te mana o te āhua, i to te hā o te mahi, te hā
e ngaro haere nei. Ka taumaha te tamaiti, ka whati te aka.
He tauira pai a Tāwhaki mō ā tātou tamariki. He tangata
ata mahi, he tangata whakatikatika āhuatanga. He tangata aroha hoki.
Ko te tikanga ka timata mai i te kōpū o te whaea te whāngai
i enei whakaaro. Ka rongo ā-wairua, ā-hinengaro i te mahana,
i te mātao, i te ātaahua, i te rerekē, i te tino pārekareka,
i te ngoikore hoki. E puta ai ia ki te ao hurihuri nei, ki te ao mārama,
kātahi ka whakatinanahia aua kai wairua.
Kaua e pōhēhē he mea hou te mahi tātai, engari i
ngā wā o ō tātau matua tipuna i tino mōhio rātou
ki ngā mahi pāngarau, arā, te tātai tangata, tātai
whenua, tātai aorangi, tātai oranga tonutanga. I aua wā
he piri tahi tonu ngā mahi pāngarau me ngā mahi o te rā,
arā, ngā māra kai, te hanga whare, te whakatere waka, te
aha.
Kaua e pōhēhē kāore rātou ngā matua tipuna
i titiro whānui, i ata whakamātautau i ngā whakaaro pāngarau
hei whakatutuki i ngā hiahia. Koinā te take i ākona ai
te mahi pāngarau, ki te āwhina i te tangata kia māmā
ai, kia tika ai ōna whakaritenga, kia tae ki tāna i hiahia ai.
Kei te hiahiatia e tātau katoa tēnei matauranga te tikanga
pāngarau, ahakoa ko wai, ahakoa te mahi. He mea whaitake i roto i
te nuinga o ngā mahi. He mea whaitake hoki i roto i ngā āhuatanga
o ia rā. Inā hiahia ngā tangata ki te whakarite hui, ki
te hanga whare, ki te mahi rānei i ngā mahi o te kāinga,
ka mahi tikanga pāngarau rātau.
I tēnei ao hurihuri, te ao hangarau, me āta mōhio ngā akonga
katoa ki te waihanga, ki te whakaoti rāpanga, ki te mahi takitini,
takitahi rānei kia taea ai e tēnā, e tēnā, te
whai atu tōna ake huarahi i roto, i tua atu rānei i te kura.
Ko te tino tūmanako, ka riro ma ngā mahi ka whakaputahia i
tēnei marautanga, e whakatō te pārekareka o te mahi pāngarau
ki roto i te whatumanawa. E u rāwa atu ai ngā whakaaro me kawe
e rātau ki te tiketiketanga, ki ngā taumata tiketike o ngā
mahi pāngarau.
Nō reira, e ai ki te whakatauākī, ki ētahi atu hoki
o ngā kupu whakaari, kia huri ngā whakaaro ki te aka matua.
Ahakoa pēhea, i ētahi wā ka pā ki te aka tāepa,
engari i te mutunga, ka hoki mai ki te aka matua.
|
